Fanginn sem lést Litla-Hrauni um helgina hét Ingvi Hrafn Tómasson og var tæplega 32 ára gamall. Faðir hans, Tómas Ingvason, er sem vænta má harmi sleginn yfir fráfalli sonar síns, en hann staðfestir að Ingvi Hrafn tók eigið líf eftir að hafa grátbeðið um hjálp í aðdraganda þessa sorglega atviks. Tómas segir að mörgum alvarlegum spurningum sé ósvarað og vill að mál sonar hans verið opnað upp á gátt.
Ingvi Hrafn hafði afplánað drjúgan hluta af fangesisrefsingu sinni og var kominn í opið úrræði á áfangaheimili Verndar. En hann var síðan handtekinn vegna kæru og stungið inn á Litla-Hraun.
„Sérsveitin handtók hann inni á Vernd fyrir vegna kæru fyrir alvarlegt brot. En nú vil ég fá að vita hvaða sönnunargagna hafði verið aflað, voru forsendur fyrir þessum harkalegu aðgerðum? Ég veit að þessi handtaka var honum mikið áfall. Þetta þurfum við að fá allt upp á borðið,“ segir Tómas í stuttu viðtali við DV.
Tómas greindi frá því í viðtali við Mannlíf í morgun að sonur hans hefði grátbeðið um hjálp en því hafi ekki verið sinnt og honum tjáð að hann fengi enga sálgæslu fyrr en á mánudaginn. Þá varð það orðið of seint. Páll Winkel sagði í svari við fyrirspurn Mannlífs að hann kannaðist ekki við þetta og að hjálparbeiðni Ingva Hrafns hefði ekki komið inn á hans borð.
„Ég skora á Pál Winkel að hafa samband við mig. Hann hefur ekki gert það ennþá,“ segir Tómas. „Hann bað um hjálp en Páll Winkel mótmælir því, segist ekki hafa fengið það inn á sitt borð. Hann bað um hjálp á föstudagsnóttina og seint um laugardagskvöldið en hann átti ekki að fá neina hjálp fyrr en á mánudaginn, en það var of seint. Hann dó á laugardagsnóttina.“
Ingvi Hrafn er annar sonur Tómasar sem tekur líf sitt. „Bróðir hans dó fyrir sex árum og tók líf sitt á sama dánardegi. Þetta er út úr kortinu. Ég er búinn að missa tvo, þetta er bara skelfilegt en enn stend ég í lappirnar og ætla að berjast við kerfið. Ég tel að fangelsisyfirvöld beri ábyrgð á dauða hans. Það á ekki að neita fólki um hjálp þegar það þarf á henni að halda. Þarna fór eitthvað mikið úrskeiðis,“ segir Tómas.
Hann býr í Noregi en er væntanlegur til landsins. Hann er staðráðinn í því að fá sannleikann í dagsljósið um allt það sem varðar hörmulegan dauða sonar hans.
