Á næstu vikum verður skriflega bílprófinu sem flestir taka gjörbreytt. Bæði verður það gert rafrænt og framsetningu spurninganna verður breytt til muna.
„Við erum að uppfæra prófið til nútímans. Við erum að rafvæða prófið og því fylgir margvíslegur ávinningur. Um leið erum við að breyta þessari framsetningu á spurningum til þess að gera spurningarnar aðgengilegri og fólk flaski ekki á spurningum uppsetningarinnar vegna,“ segir Þórhildur Elínardóttir, samskiptastjóri Samgöngustofu.
Um er að ræða skriflega hluta hina almenna bílprófs, sem veitir svokölluð B-réttindi. En það er bílprófið sem flestir, 17 ára og eldri, taka.
Prófið mun verða ein heild en ekki skipt upp í tvo hluta eins og verið hefur áratugum saman. Þá verður framsetningunni breytt. Það er að í stað spurninga með nokkrum svarmöguleikum koma spurningar þar sem settar eru fram fullyrðingar og próftakinn á að svara hvort þær séu réttar eða rangar.
„Það eru samt samt sem áður gerðar sömu kröfur til próftaka og verið hefur,“ segir Þórhildur. „Við viljum að próftakar séu vel undirbúnir og að fólk geti ekki slysast í gegnum prófið. Það að undirbúa nýja ökumenn er eitt það mikilvægasta sem hægt er að gera í þágu umferðaröryggis.“
Þá mun breytingin fela í sér vinnusparnað fyrir þá sem fara yfir og sjá um prófin. Einnig verður auðveldara að sjá hvort einhverjar spurningar reynast sérstaklega illa, það er að óvenjulega margir flaski á þeim.
Ekki er komið alveg á hreint hvenær breytingin tekur gildi. Að sögn Þórhildar verður það á næstum vikum.
