Sigríður gerir mál Maríu Sigrúnar Hilmarsdóttur að umtalsefni en greint var frá því á dögunum að hún væri ekki lengur hluti af teymi fréttaskýringaþáttarins Kveiks.
Vísir greindi fyrst frá málinu og í frétt miðilsins kom fram að Ingólfur Bjarni Sigfússon, ritstjóri Kveiks, hefði sagt að hæfileikar Maríu Sigrúnar lægju ekki á sviði rannsóknarblaðamennsku en hún væri frábær fréttalesari í sjónvarpsfréttum RÚV.
María Sigrún hafði unnið innslag fyrir þáttinn um nokkurt skeið en það var tekið af dagskrá í síðustu viku. Ýjuðu sumir að því að annarlegar hvatir lægju þar að baki en Sigríður Dögg segir að allar vangaveltur um slíkt standist enga skoðun.
Sjá einnig: Þetta er umfjöllunin sem María Sigrún fékk ekki birta í Kveik
Í færslu á Facebook í gærkvöldi vísaði Sigríður Dögg í könnun sem Blaðamannafélagið gerði fyrir síðustu kjaraviðræður þar sem í ljós kom að konur innan stéttarinnar upplifa mun meira álag í starfi en karlar og óttast í miklu meira mæli um starfsöryggi sitt.
Þá hafi alþjóðlegar rannsóknir sýnt að kvenkyns blaðamenn verði fyrir meira áreiti tengdu starfi þeirra en karlkyns kollegar; þær hljóti síður stöðuhækkun og laun þeirra séu víðast lægri.
„Ríkisútvarpið á ekki að láta það óátalið að yfirmaður tali til undirmanns síns af lítilsvirðingu gagnvart konum, miðað við þá upplifun sem María Sigrún Hilmarsdóttir hefur lýst opinberlega síðustu daga. Þá skiptir engu máli hver ástæðan fyrir ágreiningnum er. Ekki aðeins er RÚV stærsti fjölmiðill landsins, heldur er hann í ríkiseigu, og á að vera til fyrirmyndar – og lítilsvirðing gagnvart konum á ekki að líðast, hvorki þar né annars staðar.
Þó svo að jafnrétti mælist mest hér af öllum löndum er því miður staðan enn þannig að víða hallar enn á konur – og ekki síst í fjölmiðlum. Karlar stýra enn flestum fjölmiðlum landsins og á ríkismiðlinum eru karlar í nær öllum stjórnunarstöðum. Við, sem samfélag, megum aldrei hætta að benda á það sem gera má betur. RÚV – gerið betur,“ sagði Sigríður Dögg.
Hún uppfærði svo færslu sína og benti á að hún þekki Ingólf Bjarna af góðu einu og kvaðst vita að hann væri vandaður og heiðarlegur fréttamaður.
„Allar vangaveltur í fjölmiðlum um að umfjöllun Maríu Sigrúnar hafi verið tekin úr birtingu af einhverjum annarlegum hvötum standast enga skoðun. Ritstjórar ritstýra – og það kemur oft fyrir að ritstjóri metur umfjöllun þannig að hana þurfi að vinna meira. Það er leitt að sjá andstæðinga RÚV stökkva á tækifærið til að grafa undan fréttastofunni og þeim sem þar vinna, sem ég veit af eigin raun að gera það af heiðarleika og metnaði.“
