Sigríður Hrund Pétursdóttir, forsetaframbjóðandi, var á dögunum í viðtali við fréttaveituna NBC í þáttaröðinni NBC Rising Woman THOUGHT LEADER. Um er að ræða þáttaröð þar sem rætt er við konur víða að úr heiminum sem þykja skara fram úr í sínum störfum í nýsköpun, hugmynda- og lausnasmíðum og hvatningu til grósku og framfara.
Í viðtalinu fór Sigríður Hrund yfir þær áskoranir sem Ísland stendur frammi fyrir í síbreytilegu landslagi mikilvægra þátta bæði heima fyrir og á alþjóðasviðinu. Viðtalið tók á þeim áherslum sem Sigríður Hrund hefur sem forsetaframbjóðandi og hvaða áhrif hún gæti haft í embættinu til þess að styðja við þjóðina á einstökum óvissu- og þróunartímum, sem og hvernig Sigríður getur verið fyrirmynd fyrir aðra þjónandi þjóðarleiðtoga heimsins. Í því samhengi leggur Sigríður Hrund ávallt áherslu á tvo þætti, samvinnu og samstöðu.
„Það er mikill heiður að vekja alþjóðlega eftirtekt fyrir orð sín og framgöngu. Ég hef sótt alþjóðlegar ráðstefnur í nokkur ár og ávallt talað líkt og ég geri í dag. Þetta hefur vakið verðskuldaða athygli enda eru frjálsar, óháðar og sjálfstæðar konur sem láta til sín taka af skornum skammti á heimsvísu. Að vera ég sjálf, standa með mér og uppruna mínum þykir verðmætt, einstakt og fágætt og nú eftirtektarvert. Ég er afar stolt, auðmjúk og þakklát enda er mín vegferð farin fyrir okkur öll” segir Sigríður Hrund.
View this post on Instagram
