Karlmaður var fyrir helgi dæmdur í tveggja mánaða skilorðsbundið fangelsi fyrir líkamsárás í líkamsræktarstöð. Skallaði hann annan mann í andlitið og sló hann á hægri vanga.
Dómurinn féll í Héraðsdómi Reykjaness á föstudag, 8. mars.
Atvikið átti sér stað þriðjudaginn 29. nóvember árið 2022 í líkamsræktarsal Sporthússins við Flugvallarbraut 701 í Reykjanesbæ. Lögreglustjórinn ákærði manninn hins vegar ekki fyrr en þann 29. september á síðasta ári, fyrir líkamsárás af yfirlögðu ráði.
Eins og fyrr segir skallaði maðurinn brotaþola í andlitið og sló í kjölfarið hann á hægri vanga. Afleiðingarnar voru þær að það brotnaði úr hægri framtönn hans og einnig hlaut hann einkenni heilahristings, eymsli og verki í andlitsbeinum og kjálka. Þá skekktist einnig bit hans.
Lögreglustjóri gerði kröfu um refsingu og auk þess gerði brotaþoli einkaréttarkröfu upp á tæpar 1,8 milljónir króna auk vaxta. Einnig var gerð krafa um að maðurinn myndi greiða framtíðarkostnað vegna tannviðgerða.
Fyrir dómi játaði maðurinn brot sitt skýlaust en hafnaði bótakröfunni. Var málið því dómtekið án frekari sönnunarfærslu.
Í ljósi játningar og að maðurinn hafi ekki áður gerst sekur um refsivert brot var hann dæmdur í tveggja mánaða skilorðsbundið fangelsi. Einnig var hann dæmdur til að greiða brotaþola miskabætur upp á eina milljón króna og sjúkrakostnað upp á tæpar 70 þúsund krónur. Þá var hann einnig dæmdur til þess að greiða málskostnað.
