Þann 4. mars síðastliðinn féll dómur í Héraðsdómi Suðurlands í landamerkjamáli nágranna í Flóahreppi á Suðurlandi. Ragnar Valur Björgvinsson, ábúandi að Langholti 2 , höfðaði mál gegn Hreggviði Hermannssyni og dóttur hans Agnesi Hörpu, ábúendur að Langholti 1 og 1a, þann 14. nóvember 2022 og krafðist þess að landamerkjum milli jarðanna yrði breytt.
Í ítarlegum dómi Héraðsdóms Suðurlands varð niðurstaðan sú að vísa hluta málsins frá dómi sem og að sýkna Hreggvið af kröfum Ragnars Vals. Þarf Ragnar Valur að greiða Hreggviði og Agnesi Hörpu samtals 1,7 milljónir króna í málskostnað.
Deilur milli þessara nágranna hafa staðið yfir í tæpa tvo áratugi og reglulega verið fjallað um þær af helstu fjölmiðlum landsins. Ekki síst vegna þess að deilurnar hafa iðulega ratað fyrir dóm í gegnum árin.
Segja má að nágrannaerjurnar hafi hafist út af deilum um veiðirétt í Hvítá. Þær þróuðust svo út í deilur um landamerki milli jarðanna og síðan hófst eiginlega allsherjarstríð sem staðið hefur yfir árum saman.
Segja má að hápunktur þess hafi verið þegar Ragnar Valur ók bíl sinnum á Hreggvið sem kastaðist yfir húdd bifreiðarinnar. Slapp hann þó með ólíkindum vel frá hildarleiknum.
Eftir að málið hafði velkst um í kerfinu árum saman var Ragnar Valur loks sakfelldur fyrir sérstaklega hættulega líkamsárás og dæmdur í sex mánaða skilorðsbundið fangelsi með dómi Landsréttar í janúar 2021. Þá var hann dæmdur til að greiða sakarkostnað upp á rúmlega 1,3 milljónir króna.
