Ungverska þingið samþykkti aðild Svía að NATÓ á mánudaginn og þar með var síðustu hindruninni fyrir aðild landsins að bandalaginu úr sögunni. Þar með lauk 200 ára hlutleysi Svíþjóðar.
Danska ríkisútvarpið hefur eftir Steen Kjærgaard, major og hernaðarsérfræðingi við danska varnarmálaskólann, að þetta sé mjög mikilvægt því þetta sendi merki um að Evrópuríki, Bandaríkin og Kanada taki skýra afstöðu gegn stríðsrekstri Rússa og afleiðingin sé að stríðið hafi styrkt bandalagið.
„Hernaðarlega fáum við einnig samhangandi línu hjá NATÓ. Alveg frá norðri og alveg niður til suðurs eru engin göt í varnarlínunni,“ sagði hann.
Eins og kunnugt er þá kveðjur fimmta grein NATÓ-sáttmálans á um að árás á eitt aðildarríki jafngildi árás á þau öll. Aðild að NATÓ veitir Svíþjóð meira öryggi í framtíðinni.
En það eru ekki bara Svíar sem hafa ávinning af inngöngunni því NATÓ styrkist einnig, bæði hvað varðar legu Svíþjóðar og hins öfluga sænska hers. Hann er vel búinn vopnum, á háu gæðastigi, vopnaiðnaðurinn í landinu er öflugur og mikil þróun á sér stað í honum. Svíar leggja því sannarlega mikið af mörkum til að styrkja herafla NATÓ.
Staðsetning Svíþjóðar við Eystrasaltið og ekki síst sú staðreynd að eyjan Gotland tilheyrir landinu skiptir miklu máli því nú er NATÓ allsráðandi í Eystrasalti.
Eystrasaltsríkin þrjú, sem eru öll aðilar að NATÓ, eiga öll landamæri að Rússlandi og hafa miklar áhyggjur af fyrirætlunum Rússa. Með aðild Svía fá þau nú enn meiri stuðning í nágrenninu.
Kjærgaard sagðist ekki telja Pútín vera tækifærissinna eða hugsa órökrétt. Hann geti ekki ímyndað sér að Pútín hafi nokkur áhuga á að lenda í átökum við NATÓ en það þýði ekki að NATÓ eigi að gefa honum tækifæri til þess.
„Eystrasaltsríkin þrjú eru í sérstaklega mikilli hættu og það er ljóst að þetta veitir þeim meiri stuðning sem og hinni sameiginlega heiti sem öll NATÓ-ríkin hafa gefið. Þetta pirrar Pútín en um leið dregur þetta mjög úr áhuga hans á að kasta sér út í ævintýri,“ sagði Kjærgaard.
