Þann 6. mars næstkomandi verður þingfest fyrir Héraðsdómi Reykjavíkur mál sem héraðssaksóknari hefur höfðað gegn konu sem sökuð er um tvö brot gegn valdstjórninni. Ákært er vegna atvika sem áttu sér stað utandyra við Egilshöll við Fossaleyni, þann 19. nóvember árið 2022, sem og á lögreglustöðinni við Hverfisgötu.

Konan er annars vegar sökuð um að hafa ítrekað hótað lögreglumanni og fjölskyldu hans líkamsmeiðingum og lífláti, ítrekað sparkað í lögreglumanninn, tekið fast um handlegg hans og snúið upp á hann með þeim afleiðingum að lögreglumaðurinn hlaut mar á framhandlegg.

Konan er siðan ákærð fyrir brot gegn öðrum lögreglumanni og er hún sögð hafa sparkað í læri hans fyrir utan Egilshöll og aftur þegar komið var á lögreglustöðina við Hverfisgötu. Lögreglumaðurinn hlaut mar af sparkinu. Á lögreglustöðinni hótaði hún honum einnig lífláti.

Héraðssaksóknari krefst þess að konan, sem er fædd árið 1990, verði dæmd til refsingar oa greiðslu alls sakarkostnaðar.