Þann 14. mars næstkomandi verður þingfest fyrir Héraðsdómi Suðurlands mál sem héraðssaksóknari hefur höfðað gegn manni fyrir sérstaklega hættulega líkamsárás. Atvikið sem um ræðir átti sér stað aðfaranótt sunnudagsins 7. ágúst árið 2022 við Ráðhús Árborgar á Selfossi.
Manninum er gefið að sök að hafa slegið annan mann með 2,83 kg hellusteini, að minnsta kosti einu sinni í höfuðið. Brotaþoli hlaut nefbrot, blæðingu undir húð, sár á enni, skurð á vinstra eyra, bólgu undir vinstra auga og blæðingu í auga vinstra megin, eins og segir í ákæru.
Héraðssaksóknari krefst þess að maðurinn verði dæmdur til refsingar og greiðslu alls sakarkostnaðar.
Brotaþoli krefst 800.000 króna í miskabætur.