Óhætt er að segja að Jared Kushner, tengdasonur Donald Trump og fyrrum ráðgjafi hans, sé mjög ánægður með Mohammed bin Salman, sem ræður ríkjum í Sádí-Arabíu. Bin Salman hikar ekki við að láta taka fólk af lífi og stóð á bak við hið hrottalega morð á blaðamanninum Jamal Kashoggi.

Árlega eru um 200 manns teknir af lífi í Sádí-Arabíu en það og fleira kemur ekki í veg fyrir að Kushner telji bin Salman, sem er í raun einræðisherra í Sádí-Arabíu, vera framsýnan leiðtoga.

„Ég þekki manninn sem ég vann með. Mér finnst hann vera framsýnn leiðtogi og mér finnst það sem hann hefur gert fyrir svæðið hafa breytt því. Hann hefur gert margt sem þjónar hagsmunum Bandaríkjanna og ég held að hann hafi gert margt sem hefur gert heiminn betri,“ sagði Kushner í samtali við Axios.

Þegar hann var spurður út í hið hrottalega morð á Jamal Kashoggi, sem var blaðamaður hjá Washington Post, sagði hann: „Erum við enn að ræða þetta?“ Hann sagðist ekki hafa séð þær sannanir, sem bandarísk stjórnvöld búa yfir, um að bin Salman hafi staðið á bak við morðið.

Ekki er ólíklegt að það móti viðhorf hans að þegar hann lét af störfum sem ráðgjafi Donald Trump í Hvíta húsinu stofnaði hann fjárfestingarsjóð og lögðu Sádí-Arabar tvo milljarða dollara í hann. Þetta kveikti að vonum undir ásökunum um spillingu og Kushner var sakaður um að nota stöðu sína sem starfsmaður Trump í Hvíta húsinu til að verða sér úti um fjárfestingu af þessu tagi.