Írska lögreglan hefur tilkynnt að ítarleg leit hennar að jarðneskum leifum Jóns Þrastar Jónssonar sem hvarf í Dublin árið 2019, eftir að hann sást ganga frá hótelinu þar sem hann gisti, hafi engan árangur borið. Þetta kemur fram í umfjöllun írskra fjölmiðla nú um hádegisbilið.
Leitað var í almenningsgarðinum Santry í norðurhluta borgarinnar eftir að nafnlausar ábendingar bárust lögreglunni þess efnis að Jón kynni að vera þar að finna og var hluti garðsins girtur af. Aukinn kraftur var settur í rannsóknina á hvarfi Jóns eftir að þessar vísbendingar bárust sem þóttu þó nokkuð óljósar og voru þeir aðilar sem beindu þessu til lögreglunnar beðnir um að hafa samband.
Svo vildi til að systkini Jóns voru stödd í borginni um það leiti sem að ráðist var í leitina til að þrýsta á um að írska lögreglan myndi setja aukin kraft í rannsóknina á hvarfi bróður þeirra.
Í gær leit út fyrir að hundar hefðu fundið lykt af líkamsleifum í garðinum en sú virðist ekki hafa verið raunin.
Lögreglan telur að Jón hafi verið myrtur sama dag og hann hvarf. Er hann talinn hafa farið á fund óþekktra aðila til að afla meiri peninga eftir að hafa tapað háum fjárhæðum á pókermóti sem hann var að keppa á en að sá fundur hafi endað með dauða Jóns. Jón var 41 árs þegar hann hvarf.
Írska lögreglan biður þau sem kunna að búa yfir upplýsingum um hvarf Jóns að hafa samband og þá sérstaklega einstaklingana sem komu nafnlausu ábendingunum á framfæri. Lögreglan segir að rannsóknin á hvarfi Jóns muni halda áfram.
