Það ætti að skýrast eftir um fjórar vikur hvort þeir Sindri Snær Birgisson og Ísidór Nathanson eru sekir eða saklausir af ákæru um tilraun og hlutdeild í tilraun til hryðjuverka. Aðalmeðferð málsins fyrir Héraðsdómi Reykjavíkur lýkur síðar í dag en núna í eftirmiðdaginn flytja verjendur sakborninganna mál sitt.
Saksóknari í málinu, Karl Ingi Vilbergsso, flutti mál sitt í morgun og vakti athygli að hann lagði það þá í hendur dómara að ákvarða refsingu mannanna ef þeir verða fundnir sekir. Þetta kom fram í hádegisfréttum RÚV. Meginástæðan fyrir þessu er að hvorki hefur verið ákært né sakfellt áður hér á landi fyrir tilraun til hryðjuverka og málið því fordæmalaust.
Karl Ingi telur sannað að félagarnir hafi verið að undirbúa hryðjuverk og það sem hafi stoppað þá ráðagerð hafi verið handtaka þeirra í september árið 2022. Þeir sátu samfellt í gæsluvarðhaldi eftir það í yfir þrjá mánuði.
Mbl.is greindi frá því í gærkvöld að fulltrúi frá Europol, sem bar vitni undir nafnleynd við réttarhöldin, segist standa fullkomlega við þá niðurstöðu Europol að íslenska lögreglan hafi komið í veg fyrir hryðjuverk með handtöku Sindra Snæs og Ísidórs.
Ákæru Héraðssaksóknara var tvívegis vísað frá dómi áður en málið var loks dómtekið eftir að breytt ákæra hafði verið lögð fram. Þótti bæði héraðsdómi og Landsrétti skorta á að skýrt væri í ákæru hvaða orðfæri og yfirlýsingar í samskiptum sakborninganna ættu að sýna fram á að þeir hefðu tekið ákvörðun um að fremja hryðjuverk. Málatilbúnaðurinn er að mjög miklu, en þó ekki öllu leyti byggður á skilaboðaspjalli Sindra Snæs og Ísidórs þar sem þeir ræða möguleg óhæfuverk. Verjendur þeirra hafa ítrekað staðhæft að skilaboðaspjallið hafi verið ábyrgðarlaust og smekklaust óratal og algjörlega skorti gögn um raunverulegar fyrirætlanir og undirbúningsathafnir þeirra til hryðjuverka.
