Í tilkynningu frá Veðurstofu Íslands kemur fram að land rísi 0,5 – 1,0 sentímetra á dag sem er svipaður hraði og eftir síðustu eldgos. Þá haldi kvika áfram að safnast í kvikuhólfið undir Svartsengi.
„Það eru því miklar líkur á að atburðarásin endurtaki sig eftir nokkrar vikur með nýju kvikuhlaupi og eldgosi,“ segir í tilkynningunni.
Bent er á það að frá því á hádegi 8. febrúar hafi jarðskjálftavirkni á svæðinu norðan Grindavíkur verið minniháttar, en um 50 smáskjálftar hafa mælst, allir um eða undir 1,0 að stærð.
„Einnig hefur verið smáskjálftavirkni í vestanverðu Fagradalsfjalli, en þar mældust rúmlega 100 skjálftar, flestir um eða undir 1,0 að stærð. Þar hefur smáskjálftavirkni verið viðvarandi síðustu vikur en dýpi skjálftanna er um 6 – 8 km.“
Uppfært hættumatskort verður birt seinna í dag.