Stór lögregluaðgerð átti sér stað fyrir framan íbúðahús við Nýbýlaveg í Kópavogi um hálfáttaleytið í morgun. Samkvæmt upplýsingum frá heimildarmanni voru sex lögreglubílar á vettvangi, fjórir ómerktir og tveir merktir, og vettvangur var innsiglaður með gulum borða.
Málið fór fljótt inn á borð rannsóknarsviðs lögreglunnar á höfuðborgarsvæðinu. Fulltrúi hjá lögreglustöð 3 sagðist í samtali við DV ekki hafa upplýsingar um málið.
DV náði sambandi við Grím Grímsson hjá rannsóknarsviði sem sagði: „Ég ætla ekki að fara neitt út í það hvað þarna er á ferðinni. En það er mál sem tengist Nýbýlavegi. Það er ekkert sem ég vil segja á þessari stundu um það.“
Grímur vill hvorki játa né neita að mannslát hafi átt sér stað, hann segir einfaldlega að á þessari stundu vilji lögregla ekki tjá sig um málið. Grímur segir að aðgerðir á vettvangi hafi hafist upp úr hálfátta. Aðspurður segir hann að aðgerðum sé lokið á vettvangi. „Það eru svo sem engar aðgerðir lengur, það er bara mál í rannsókn í kjölfarið á þessum aðgerðum.“ Grímur segir möguleika vera á því að lögreglan geri út tilkynningu um málið seinnipartinn í dag.
Grímur sagði að lokum: „Ég vil ekkert láta hafa eftir mér um hvað þarna er í gangi.“
Samkvæmt íbúa sem býr í nágrenni við umrætt hús komu sjúkrabílar einnig á vettvang. Viðkomandi óttast að harmleikur hafi átt sér stað en þekkir ekki til málsins. Þrjár til fjórar íbúðir eru í húsinu þar sem atvikin áttu sér stað en viðmælandi segist ekki vita í hvaða íbúð þetta var.
Samkvæmt Vísir.is er málið afar viðkvæmt og miklir rannsóknarhagsmunir undir. Þetta segir Eiríkur Valberg lögreglufulltrúi. Hann segist ekki geta gefið upp um hvers konar aðgerðir var að ræða.
DV náði sambandi við nágranna úr næsta húsi sem segist hafa séð tvo sjúkrabíla koma að húsinu um kl. 8 morgun. Meira veit hann ekki um málið og varð lítið sem ekkert var við aðgerðir lögreglu.
