Veðurstofa Íslands hefur gefið út gular viðvaranir fyrir mest allt landið vegna storms sem gengur yfir í nótt og fyrri part morgundagsins. Einar Sveinbjörnsson veðurfræðingur lýsir lægðinni sem „Stórum sunnan.“
Búið er að gefa út gular viðvaranir fyrir allt landið að suðausturlandi undanskildu. Þær fyrstu taka gildi klukkan 4:00 í nótt og þær síðustu renna út klukkan 15:00. Á höfuðborgarsvæðinu gildir gul viðvörun frá klukkan 4:00 til klukkan 7:30.
„Kröpp lægð kemur upp að suðvestanverðu landinu í nótt og fer til norðurs skammt fyrir vestan land í fyrramálið. Um leið dýpkar hún verulega,“ segir Einar í færslu á samfélagsmiðlum. „Með henni fylgir harður S- og SSA vindstrengur samfara hlýindum. Versta veðrið stendur ekki lengi, víðast aðeins í 3 til 4 klst.“
Veðurstofan spáir 18 til 25 metrum á sekúndu á höfuðborgarsvæðinu með snörpum vindhviðum. Er fólk hvatt til að ganga frá lausamunum. Allmikil úrkoma fylgir þessu. Varasamt er að vera á ferð á þessum tíma.
Á Vestfjörðum er búist við talsverðri slyddu eða snjókomu og líklegt að færð spillist, einkum á fjallvegum.
Mesti vindurinn í byggð verður á Austurlandi að Glettingi og Norðausturlandi, það er 20 til 28 metrar á sekúndu og vindhviður allvíða yfir 35. Á Miðhálendinu er búist við 23 til 28 metrum á sekúndu með snörpum hviðum.
„Lægðir eins og þessi eru sérlega varasamar. Ekki bara að þær séu krappar og hraðfara hér nærri, heldur fylgir þeim mikill sunnanstrengur sem fer yfir landið. Þá slær háloftaröstinni sér niður. Við slíkar aðstæður myndast gjarnan miklar bylgjur yfir hálendinu með vindstrengjum og sviptivindum,“ segir Einar. „Síðan sést í svokallað stingröst sunnan við sjálfa lægðarmiðjuna. Hún gæti náð inn á Snæfellsnes og Vestfirði eftir að hið eiginlega óveður með skilunum er farið hjá.“
Einar segir að enginn ætti að vera á ferðinni þennan tiltölulega stutta tíma sem versti hvellurinn gengur yfir. Tjón gæti hlotist.
„Saga síðustu aldar geymir mörg tjónaveður af þessari gerðinni þegar kröpp og hraðfara lægð fer skammt fyrir vestan land. Ekki síst um norðvestanvert landið,“ segir hann að lokum í færslu sinni.
