Blikksmiðjan Stjörnublikk hefur verið dæmd til að greiða fyrrverandi starfsmanni sínum rúmlega 3,8 milljónir króna í vangoldin laun og tæplega 1,3 milljónir króna í málskostnað.
Maðurinn starfaði sem sölustjóri hjá fyrirtækinu en var síðan sakaður um að skara eld að eigin köku og stela frá fyrirtækinu með því að stofna til viðskipta í eigin nafni við viðskiptavin fyrirtækisins. Einnig var hann sakaður um að gefa út falsaðan reikning til eigenda bílstkúra í Reykjavík og afhenda vörur til þeirra án þess að krefjast greiðslu fyrir hönd Stjörnublikks.
Blikksmiðjan taldi sér ekki fært að hafa manninn í vinnu eftir þennan trúnaðarbrest, rak hann og hætti samstundis launagreiðslum til hans. Maðurinn krafðist hins vegar launa á uppsagnarfresti og orlofs. Einnig gerði hann kröfu um miskabætur. Krafa hans í heild var upp á rúmlega 4,8 milljónir króna og fékk hann verulegan hluta af henni dæmdan til sín með dómi Héraðsdóms Reykjaness sem féll þann 16. janúar.
Héraðsdómur taldi Stjörnublikk ekki hafa fært nægar sönnur á það að þeim hafi verið heimilt að rifta ráðningasamningi við manninn fyrirvaralaust. Er það niðurstaða dómsins að riftunin hafi verið ólögmæt. Því beri starfsmanninum að fá laun á uppsagnarfresti og orlof.
Hins vegar telur dómurinn að ekkert bendi til þess að maðurinn hafi hlotið miska af málinu og var því kröfu um miskabætur hafnað.
Dóminn má lesa hér.