Landris heldur áfram við Svartsengi og er áfram metin mjög mikil hætta innan Grindavíkur. Þetta kemur fram í uppfærslu Veðurstofu Íslands Íslands í dag vegna stöðunnar á Reykjanesskaganum.

Í gær var greint frá því að áfram séu skýr merki um landris undir Svartsengi og virðist sú þróun halda áfram. Enn er þó of snemmt að fullyrða um hraðann á landrisinu þar sem stutt er síðan gaus á svæðinu.

Að sögn Veðurstofunnar er verið að meta gögn frá GPS mælum til að fá heildarmat á stöðuna. Aflögun virðist þó vera svipuð og eftir eldgosið 18. desember.

„Um 200 jarðskjálftar hafa mælst við kvikuganginn síðan í gær, sá stærsti 1,4 að stærð. Tæplega 70 smáskjálftar frá miðnætti. Þetta eru færri skjálftar en mældust deginum áður. Veðrið hefur haft áhrif síðustu daga en samt er búið að draga úr fjölda skjálfta. Áfram er hætta mjög mikil innan Grindavíkur í tengslum við sprungur og að jarðvegur hrynji ofan í þær.“