Eldgos hófst rétt fyrir kl. 8 í morgun norðan við Grindavík. Allir voru farnir úr Grindavík þegar eldgos hófst. Hraun rennur um 4-500 metra frá bænum.

„Það er voðalega erfitt að segja akkúrat á þessari stundu. Þetta er lítill hluti af gossprungunni sem er fyrir innan varnargarðinn, stærsti hluti gossprungunnar er réttu megin við varnargarðinn,“ segir Kristín Jónsdóttir hópstjóri náttúruvár hjá Veðurstofu Íslands í fréttum kl. 10 hjá RÚV, aðspurð um hvort hraun muni renna til Grindavíkur. „Við verðum að sjá hvað gerist með þetta hraun sem rennur nú.“

Segir hún gosið minna en gosið 18. desember, sprungan sé minni en kílómetri. 

„Við fengum fyrirvara núna, kannski ekki mjög langan, 5 klukkutíma, sem var ótrúlega mikilvægur.“ 

Segir Kristín skjálfta hafa verið undir Grindavík í nótt og snemma í morgun. „Við höfum fylgst með kviku flæða eftir þessari sprungu, og skjálfta færast suður á bóginn. Það má segja heppilegt að gosið sé norðan við bæinn. Við vorum að horfa á að gossprungur hefðu getað opnast í bænum.“