Sara Lind Guðbergsdóttir verður í stól forstjóra Ríkiskaupa til áramóta hið minnsta. Fjármálaráðuneytið ákvað að auglýsa ekki stöðuna núna í haust eins og tilkynnt hafi verið.

Að sögn Elvu Björk Sverrisdóttur, upplýsingafulltrúa ráðuneytisins, stendur yfir skoðun á framtíðarfyrirkomulagi umgjarðar innkaupamála hjá ríkinu. Þar verður lagt mat á hvort hagkvæmt sé að sameina stofnunina öðrum einingum í samræmi við áherslur um einföldun stofnanakerfisins.

„Sá tími sem forstjóri Ríkiskaupa er settur í embætti hefur verið framlengdur til áramóta, á meðan sú skoðun stendur yfir,“ segir Elva.

Mannlíf greindi frá því í morgun að skipunartíminn hefði verið framlengdur. Sara Lind var sett tímabundið í stöðuna frá 1. apríl til 31. ágúst eftir að Björgvin Víkingsson lét af störfum. Þrátt fyrir yfirlýsingar hefur staðan ekki verið auglýst. Segir þar að málið þyki lykta að vinavæðingu en Sara Lind, sem er eiginkona Stefáns Einars Stefánssonar hlaðvarpsstjórnanda og kampavínsinnflytjanda, sé tengd Sjálfstæðisflokknum.

Í frétt Hringbrautar af málinu í apríl síðastlinum var sagt að grunur léki á að Bjarni Benediktsson, fjármálaráðherra, myndi skipa Söru Lind í stöðuna í sumar að undangenginni auglýsingu.