Systurnar þrjár sem sjá um hlaðvarpið Lömbin þagna ekki segja að það sé alltaf eitthvað nýtt í gangi og nýjar vendingar í Lambeyradeilunni. „Enginn býr á nýju Lambeyrum, en húsið var leigt út á sumrin, áður en Daði Einarsson stoppaði það með áreiti og ógnandi tilburðum,“ segja systurnar og segja húsið því að mestu notað af eigendum.
„Núna í lok ágúst var fólk sem leigði nýju Lambeyra og það gekk mjög vel. Þau tóku mjög flotta loftmynd af túnunum þar sem sjá má túnin og skemmdirnar, sem sjást þó minna en áður þar sem gróið hefur í sárin.
Fólkið sem var að leigja opnar póstkassann og kíkir inn í hann. Og það sem þau sáu kom á óvart. Í póstkassanum voru högl úr haglabyssu. Ekki er vitað hvenær þetta kom, eða hvort að þetta hafi komið í kjölfarið á Lömbin þagna ekki og ætlað sem hótun. Við að heyra af þessu sagði ítölsk samstarfskona Ásu: “Þetta eru eins og skilaboð frá mafíunni,“ segja systurnar sem segja þetta hafa verið gert í skjóli nætur. Engar sannanir séu fyrir því hver setti höglin í póstkassann, en systurnar þrjár hafa föðurbræður sína sterklega grunaða.
„Hvernig á maður að túlka það að einhver skilur eftir högl í póstkassanum hjá sér? Þetta er ekki eitthvað sem gerist óvart, og er greinilega bara gert til þess að senda ógnandi skilaboð, og er hugsanlega ætlað sem hótun. Við höfum fengið önnur “skilaboð” frá föðurbræðrum okkar: skítaskóflur við íbúðarhús, dauð kindahræ og ofsafenginn akstur í kringum íbúðarhús, svo að eitthvað sé nefnt.“
Systurnar þrjár voru allar saman á Ítalíu nýlega. „Bæði til að fá smá frí, fagna styrknum sem Ása fékk fyrir stjarneðlisfræðiverkefnið sitt upp á 1,5 milljónir evra eða 218 milljón krónur, en einnig til að taka upp fleiri þætti af Lömbin þagna ekki, því lömbin mega ekki þagna. Ástæðan af hverju við byrjuðum ekki fyrr á réttlætishlaðvarpinu var einmitt af því að Ása var upptekin af því að sækja um styrkinn. Og fyrsti frídagurinn hennar, eftir margra mánaða törn, fór í það að taka upp fyrsta þáttinn af Lömbin þagna ekki,“ segja systurnar.
Sjá einnig: Íslenskur stjarneðlisfræðingur leitar að fjársjóðum í dvergvetrarbrautum
Systurnar rekja það að árið 2017, þegar faðir systranna þriggja og systur hans keyptu Lambeyra á uppboði þá voru systkinin að reyna að halda túnunum kindalausum, til að tryggja góðan heybúskap. En allt kom fyrir ekki, allltaf voru margar kindur á túnunum.
„Þetta kom föður okkar á óvart þar sem girðingarnar voru í lagi þá og hann var alltaf að reka kindurnar í burtu. En skýriningin kom í ljós. Alltaf þegar Ásmundur Einar Daðason, núverandi barnamálaráðherra, fór upp í fjárhús (í eigu Daða föður hans), þá voru hliðin viljandi skilin eftir opin til þess að kindurnar kæmust inn á túnin. Ætlunin var að reyna að koma í veg fyrir að Lambeyrar fengju góða heyuppskeru að hausti,“ segja systurnar, sem segja þetta litla sögu í stóra samhenginu, en lýsi vel innræti Ásmundar Einars að mati systranna þriggja.
Systurnar segja að aðaltilgangur nýjasta þáttarins af Lömbin þagna ekki sé að fjalla um yfirlýsingu Söndru Sjafnar um ógeðfelldar samræður Ásmundar Einars og vinar hans Ámunda. Segja systurnar þá atburðarás lýsa því mjög vel hvernig Ásmundur Einar hagi sér þegar hann er í valdastöðu gagnvart fólki.
„Nýlega lýsti Sandra Sjafnar myndbandi sem hún sá, þar sem Ásmundur Einar og Ámundi töluðu á niðrandi og kynferðislegan hátt um unga körfuboltakonu að henni viðstaddri og það náðist á myndband. Þannig var mál með vexti að Ásmundur Einar og Ámundi voru að sækja hana á flugvöllinn og keyra hana til Borgarness þar sem hún átti að spila körfubolta fyrir Skallagrím. Unga konan var að taka myndband af náttúru Íslands og setur á samfélagsmiðla sína en í bakgrunni má heyra tal þeirra þar sem þeir tala niðrandi og kynferðislega um hana, og nefna húðlit hennar í því samhengi. Unga konan setur myndbandið á samfélagsmiðla sína, grunlaus um samtal þeirra, og margir sáu þetta myndband. Íslendingarnir skildu auðvitað það sem sagt var og þegar Ásmundur Einar og Ámundi frétta af myndbandinu þá biðja þeir hana um að eyða því af samfélagsmiðlum. Körfuboltakonan neitar því en dóttir Ámunda biður hana seinna um að eyða myndbandinu og lýgur því að henni að Ásmundur Einar og Ámundi hafi verið að tala um viðkvæm pólitísk mál,“ segja systurnar í þættinum.
„Blaðamaður Mannlífs hafði samband við körfuboltakonuna og staðfesti hún að þeir hefðu beðið hana um að eyða myndbandinu, og að hún hafi neitað en eytt því þegar dóttir Ámunda bað hana. Það kemur kannski fáum á óvart en dóttir Ámunda var síðar ráðin í ábyrgðarstöðu innan ráðuneytis Ásmundar Einars árið 2021,“ segja systurnar og spyrja sig hvort Ásmundur Einar hafi einhvern tímann skipað fólk í stöður án þess að þekkja fólkið fyrir eða það sé gert í greiðatilviki. Segjast þær vita fleiri dæmi um slík tilvik.
„Í samtali við Mannlíf segir Ásmundur Einar samtímis að þetta sé gömul saga, og að hann kannist ekkert við hana. Ráðherra reyndi að gera lítið úr málinu með því að kalla þetta kjaftasögu, sem er einfaldlega ekki satt, því bæði Sandra Sjafnar og bandaríska körfuboltakonan Tavelyn hafa sagt frá sinni eigin upplifun, sem getur þar með augljóslega ekki talist kjaftasaga,“ segja systurnar.
Systurnar þrjár segjast hafa vitað af myndbandinu og heyrt af því úr allt annarri átt. Segja þær að það sem þær heyrðu af myndbandinu á sínum tíma sé 100% í samræmi við frásögn Söndru Sjafnar. Systurnar þrjár hrósa Söndru fyrir mikið hugrekki, enda ekki auðvelt að koma svona fram. Systurnar þrjár spyrja hvort þetta sé besti aðilinn til að sinna starfi barnamálaráðherra.
„Við systur höfum vitað af þessu máli í nokkur ár, frá annarri heimild en Söndru sem við þekkjum ekkert, höfum einungis talað við hana núna nýlega eftir birtinguna. En vegna þess að við höfum ekki séð þetta myndband sjálfar fannst okkur við ekki geta komið fram með þetta mál, frekar en önnur mál sem við höfum einungis frásagnir annarra af.
Í þættinum bendum við meðal annars á að Sandra sá myndbandið sjálf, og segir frá sinni eigin upplifun. Þar að auki hefur körfuboltakonan sagt frá atburðarrásinni og því að þeir Ásmundur Einar og Ámundi hafi beðið hana að eyða myndbandinu. Það að kalla þetta kjaftasögu eins og Ásmundur Einar gerir í samtali við Mannlíf er því einfaldlega ekki satt,“ segja systurnar.
„Ásmundur Einar var í forréttindastöðu gagnvart körfuboltakonunni, og nýtti sér það að hún talaði ekki íslensku til að taka þátt í niðrandi og kynferðislegum umræðum um körfuboltakonuna á meðan hún var með honum í bíl.“
Í þættinum er einnig fjallað um frétt þar sem að körfuboltakonan Tavelyn, segir frá því þegar Ásmundur Einar og Ámundi fóru heim til hennar eftir tapleik þar sem þeir sökuðu hana um að tapa leiknum viljandi. „Henni brá töluvert að þeir skildu koma heim til hennar, gagngert til að draga hana niður fyrir körfuboltaleikinn. Ámundi var orðljótari og kallaði hana “Little black N**** bitch”, ekkert var minnst á að Ásmundur Einar hefði mótmælt slíku tali,“ segja systurnar sem vilja meina að þögn er sama og samþykki. „Sérstaklega þar sem Ásmundur Einar hefur ennþá mjög náið samneyti við Ámunda, og hefur meðal annars ráðið hann í afleysingar sem ráðherrabílstjóra.“
Systurnar þrjár segja „ósk okkar með réttlætishlaðvarpinu Lömbin þagna ekki er að segja sannleikann, að ofbeldi og skemmdarverk hætti, og að lögreglan á Vesturlandi fari að sinna sínu lögbundna starfi.“
