Steinunn Þórðardóttir, sérfræðingur í öldrunar- og lyflækningum, hefur verið ráðin í nýja stöðu framkvæmdastjóra lækninga hjá Hrafnistu frá og með 1. nóvember. Steinunn hefur undanfarin fimm ár gegnt stöðu yfirlæknis heilabilunareiningar Landspítala ásamt því að vera formaður Læknafélags Íslands undanfarin ár en því starfi mun hún sinna áfram samhliða starfi á Hrafnistu.

Þetta kemur fram í tilkynningu frá Hrafnistu.

Í tilkynningunni segir jafnframt að Steinunn sé, eftir því sem best er vitað, fyrsti öldrunarlæknirinn með sérþekkingu á heilabilunarsjúkdómum sem ráðinn hefur verið til starfa á hjúkrunarheimili á Íslandi. Ljóst sé að hún muni koma með dýrmæta viðbótarþekkingu til Hrafnistu og muni koma að því að efla enn frekar þá þjónustu sem veitt er íbúum og öðrum þjónustuþegum. Hrafnista hafi átt í mjög góðu samstarfi við Heilsuvernd sem þjónustar heimilin með læknisþjónustu og muni það samstarf halda áfram í óbreyttu formi.

Í tilkynningunni er haft eftir Maríu Fjólu Harðardóttir, forstjóra Hrafnistu

„Framkvæmdastjóri lækninga mun verða hluti af framkvæmdaráði Hrafnistu og verður góð viðbót við þann sterka hóp í stefnumótun og framtíðarsýn á þjónustu við eldra fólk og aðra sem þiggja eða munu þurfa á þjónustu að halda í framtíðinni. Við erum sannfærð um að þessi spennandi nýjung í stjórnendahópi Hrafnistu muni efla enn frekar þá faglegu og öflugu þjónustu sem Hrafnistuheimilin veita nú þegar og gera þeim enn betur kleift að viðhalda því markmiði að vera ávallt leiðandi í þjónustu við aldraða hér á landi.“