Fjölmiðlar, þar á meðal DV sögðu í gær frá bréfi formanns stjórnar Íslensku óperunnar, Péturs J. Eiríkssonar, til forsætisráðherra, fjármálaráðherra og menningar- og viðskiptaráðherra. Í bréfinu kemur fram að stofnuninni hafi verið tilkynnt að framlögum ríkisins til hennar verði hætt og að öllu óbreyttu sjái Íslenska óperan ekki fram á annað en að þurfa að hætta starfsemi.
Íslenska óperan segir einnig að stjórnvöld hafi ekki haft mikið samráð við stofnunina um framtíð óperuflutnings á Íslandi.
Tillögur um þjóðaróperu sem stefnt er að því koma á laggirnar liggja enn ekki fyrir og, menningar- og viðskiptaráðuneytið, segir í tilkynningu að það sé ekki rétt að framlögum til Íslensku óperunnar verði hætt áður en búið sé að móta framtíð óperustarfsemi hér á landi. Ráðuneytið segist hafa átt í nánu samtali við forsvarsmenn Íslensku óperunnar um fjármögnun hennar á þessu og næsta ári.
Í tilkynningu frá Íslensku óperunni kemur fram að hún vilji árétta að staðan snúist ekki um hvort aðgerðir ráðuneytisins komi stofnuninni á óvart heldur að þær séu ekki í samræmi við þau markmið sem lögð voru til grundvallar þ.e. að ríkisrekin þjóðarópera [Íslenska óperan er sjálfseignarstofnun, innsk. fréttamanns] yrði byggð á Íslensku óperunni með það að markmiði að standa vörð um þau menningarverðmæti og arfleifð sem þar hafi orðið til á löngum tíma og tryggja samfellu í starfseminni.
Um sé að ræða einhliða ákvörðun ráðuneytisins og mjög takmarkað samráð haft við Íslensku óperuna varðandi með hvaða hætti best væri að standa að þessu ferli á farsælan hátt. Þá hafi sviðsmyndir þær sem verið sé að vinna hjá ráðuneytinu og hafi verið kynntar fyrir fulltrúum listamanna aldrei verið kynntar fyrir Íslensku óperunni, svo það sé ekki rétt að þetta ferli sé unnið í náinni samvinnu við stofnunina. Stofnunin hafi einnig búið við mikla óvissu á undanförum árum og oftar en ekki starfað án samnings við ráðuneytið, sem skapað hafi mikla óvissu og óöryggi.
Upphæðin sem ráðuneytið taki fram í tilkynningu sinni að Íslensku óperunni verði úthlutað á þessu og næsta ári, þ.e. 334 milljónir króna, sé samanlögð upphæð framlags þessa árs sem búið sé að greiða og verkefnastyrks sem úthlutað verður til sviðsetningar á óperunni Agnes haustið 2024. Þetta fjármagn dugi ekki til þess að halda stofnuninni starfandi, svo hún leggist óhjákvæmilega af löngu áður en möguleg þjóðarópera sem er í undirbúningi tekur til starfa. Þetta telur Íslenska óperan vera mjög vanhugsaða ákvörðun og mikið menningarslys.
