Jaroslaw Kaminski, pólski maðurinn sem stunginn var til bana í leiguherbergi að Drangahrauni í Hafnarfirði þann 17. júní síðastliðinn, hafði búið mjög lengi á Íslandi og átti djúpar rætur í samfélaginu. Hann var vel liðinn á Íslandi og naut virðingar.
Jaroslaw hefur búið á Íslandi allar götur frá því 2009 eða lengur. Hann var giftur pólskri konu sem er búsett hér á landi og eiga þau eina dóttur sem er í kringum 17-18 ára aldur. Þau skildu að skiptum og Jaroslaw giftist konu sem búsett er í Póllandi og heitir Ewa Kamińska. Hún á barn sem Jaroslaw hafði gengið í föðurstað og hafði hann farið margar ferðir til Póllands til að vera með þessari nýju fjölskyldu sinni. Jaroslaw og Ewa giftust árið 2021.
Jarowslaw var lærður kjötiðnaðarmaður og með mjög langa starfsreynslu í faginu. Hann hafði orð á sér fyrir að koma þekkingu sinni til skila til yngri kollega, studdi menn áfram og sagði þeim til. Veitingamenn í Hafnarfirði bera honum góða söguna sem vingjarnlegum og viðkunnanlegum viðskiptavini.
Jaroslaw, sem var á fimmtugsaldri, bjó lengst af hefðbundnu fjölskyldulífi með eiginkonu og dóttur. Hann söðlaði hins vegar um og skipti um vinnustað. Jafnframt flutti henn í leiguherbergi að Drangahrauni og tók að senda peninga reglulega til nýju fjölskyldunnar í Póllandi. Meðleigjandi hans hafði búið miklu skemur á landinu en hann virðist hafa lagt til hans með hnífi á aðfaranótt 17. júní. Þess má geta að Jaroslaw var maður stór vexti, hár og þrekvaxinn.
Hinn grunaði hringdi í vinkonu Jaroslaws um fimmleytið á 17. júní og greindi henni frá því hvað hann hafði gert. Hún kom á vettvang ásamt karlmanni áður en þau tilkynntu málið til lögreglu.
Grímur Grímsson, yfirlögregluþjónn á miðlægri rannsóknardeild Lögreglunnar á höfuðborgarsvæðinu, segir að málið sé enn í rannsókn og hafi ekki farið frá lögreglu til héraðssaksóknara. Hann vill engu svara um það hvort hinn grunaði hafi játað verknaðinn en segir aðspurður að í heild hafi yfirheyrslur gengið vel. Gæsluvarðhaldsúrskurður yfir manninum rennur út 19. júlí næstkomandi.
Ekkert liggur fyrir um ástæðu árásarinnar. Samkvæmt heimildum DV var Jaroslaw stunginn fimm sinnum með eggvopni. Hann var í nærfötum er hann fannst látinn og hafði misst mikið blóð. Leiða má líkur að því að hann hafi legið í rúmi sínu er meðleigjandinn réðst á hann en það er ekki staðfest og lögregla svarar engu um mögulegar aðstæður á vettvangi þegar árásin var framin.
