Ingunn Ása Ingvadóttir hefur komið af stað söfnun fyrir útfararkostnaði, en barnabarn hennar, Iyanna Brown, var skotin til bana í Detroit í Bandaríkjunum á fimmtudaginn. Hún var aðeins 23 ára að aldri.

Fjölskyldan er harmi slegin, en lögregla hefur sem stendur engan grunaðan um ódæðið.

Ingunn segir að Iyanna hafi verið falleg sál, fyndin, vel gefin og hafi fært fjölskyldu sinni ómælda gleði. Hún hafi verið dásamlegt barnabarn og líka frábær dóttir. Eftir að hún komst til ára hafi hún orðið besta vinkona móður sinnar. Estherar Maríu, en saman hlógu þær mikið og elskaði Iyanna fátt meira en heimilismatinn frá mömmu sinni.

Esther er sjúkraliði og er fædd á Íslandi. Hún bjó hér um tíma eftir að Iyanna fæddist, en Iyanna gekk þá í leikskóla í Hafnarfirði.

Bróðir Iyönnu er Elijah og er hann aðeins 18 ára að aldri, en þau systkinin voru mjög náin, og á hann nú um sárt að binda á meðan hann tekst á við þær óbærilegu aðstæður að hafa misst systur sína langt fyrir aldur fram.  „Sársaukinn sem hann er að upplifa eftir þennan missi er óbærilegur,“ segir á síðu söfnunarinnar.

Esther er einstæð móðir og hefur verið fyrirvinna barna sinna, oft við þröngan kost, en þau hafa alla tíð verið bara þrjú saman. Horfir fjölskyldan því fram á fjárhagsáhyggjur ofan í gífurlega sorgina þar sem útfararkostnaður verður töluverður.

Segir á GoFundMe-síðu sem Ingunn hefur komið á laggirnar að öll framlög séu vel metin. Vonir standi til að safna fyrir útförinni annars vegar og svo fyrir því tekjufalli sem Esther hefur og mun verða fyrir á næstunni á meðan hún syrgir dóttur sína og styður son sinn í gegnum hans sorg.

Styðja má við fjölskylduna hér. 

Lögreglan í Detroit fer nú með rannsókn málsins, en atburðarásin er ekki á hreinu. Iyanna var stödd inn í bifreið þegar hún varð fyrir skoti. Viðbragðsaðilar fluttu hana með flýti á næsta sjúkrahús þar sem hún lést af áverkum sínum.