„Nú er auðvitað hverjum og einum í sjálfsvald sett að ákveða hvort hann vill lifa lengur eða ekki. Það eru eiginlega einu „mannréttindin“ sem nánast ógerlegt er að taka af fólki. En þetta er sannast sagna bölvað leiðindaúrræði og fæst fólk grípur til þess fyrr en öll sund sýnast lokuð,“
segir Jón Daníelsson í pistli á Vísi.
Vísar Jón þar til atviks þegar heimilislausum karlmanni með lögheimili í Hafnarfirði var vísað frá Gistiskýlinu á Lindargötu sökum þess að verklagsreglur Hafnarfjarðarbæjar segja til um að greiða aðeins fyrir þrjár nætur þar. Systir mannsins sagði í viðtali við Heimildina að neitunin hefði valdið því að bróðir hennar greip til örþrifaráðs og tók eigið líf.
Sjá einnig: Svipti sig lífi eftir ítrekaðar frávísanir frá gistiskýlinu – Hafnarfjarðarbær neitaði að greiða gistinguna
„Annað slagið blöskrar manni mannvonskan í þessum heimi. Gistiskýlin eru á vegum Reykjavíkurborgar en maðurinn var skráður í Hafnarfirði. Nágrannasveitarfélögin hafa gert samninga um að greiða fyrir gistingu fólks sem þar er skráð og því á ekki að þurfa að vísa neinum frá á grundvelli lögheimilis.
Hitt er verra, að eftir því sem best verður lesið út úr fréttum var manninum vísað frá að kröfu stjórnvalda í Hafnarfirði. Í fljótu bragði virðist þetta svakalegri mannvonska en svo, að skýringin fái staðist. En viti menn,“
segir Jón og rekur svör Hafnarfjarðarbæjar sem Heimildin óskaði eftir skriflegum ástæðum þess: „að bæjarfélagið krefst þess að ákveðnum einstaklingum með lögheimili í bæjarfélaginu skuli vísað frá neyðarskýlum í Reykjavík.“
Í svari embættismanns hjá Hafnarfjarðarbæ segir orðrétt:„… samkvæmt vinnulagi er haft samband við sveitarfélagið ef einstaklingur (sem er með lögheimili í Hafnarfirði) hefur gist í gistiskýlinu í þrjár nætur, sem getur verið vísbending um að einstaklingurinn eigi við húsnæðisvanda að stríða.“
Svör bæjarins loðin og teygjanleg
Segir Jón svarið auðvitað ámóta loðið og teygjanlegt og gera mátti ráð fyrir. „Út af fyrir sig má kannski kalla það skemmtiatriði út af fyrir sig, að þrjár nætur í gistiskýli gætu hugsanlega verið vísbending um húsnæðisvanda!“
Í öðru svari til Heimildarinnar er áréttað að verklagið hafi verið þannig að eftir þriðju nóttina í gistiskýli sé einstaklingum með lögheimili í Hafnarfirði gert að leita sér aðstoðar hjá sínu sveitarfélagi áður en til áframhaldandi gistingar kemur.
Sjá einnig: Harma andlát heimilislauss karlmanns – Vísað í skýra verkferla
Segir Jón þannig afstöðu Hafnarfjarðarbæjar skýra:
„Hafnarfjarðarbær er tilbúinn að borga fyrir þrjár nætur í gistiskýli. Komi einhver í fjórða sinn, skal honum hent út. Í þessu tilviki virðist frávísunin hafa gert útslagið. Maðurinn sá enga aðra leið frá hinni algeru útskúfun en að hætta bara að vera til.
Hafnarfjarðarbær sendir svo aðstandendum sínar innilegustu samúðarkveðjur og bókfærir hagnaðinn. Slík samúðarkveðja er vissulega ódýrasta lausnin á húsnæðisvandanum. En ógeðfelldara gerist það varla.
Ef einstaklingar glíma við sjálfsvígshugsanir er bent á Hjálparsíma Rauða krossins 1717 og netspjall Rauða krossins 1717.is. Opið allan sólarhringinn. Einnig má hafa samband við Píeta-samtökin sem veita ókeypis ráðgjöf í síma 552-2218, allan sólarhringinn. Netspjall Heilsuveru þar sem svarar hjúkrunarfræðingur er líka opið frá kl.8-22 alla daga. Fyrir þau sem misst hafa ástvin í sjálfsvígi má fá stuðning í sorg hjá Sorgarmiðstöð og hjá Pieta samtökunum.
