Samband hefur rofnað við lítinn kafbát sem notaður er til að ferja ferðamenn að flaki Titanic sem liggur á tæplega fjögur þúsund metra dýpi um sex hundruð kílómetrum undan ströndum Nýfundnalands.

Björgunaraðilar í Bandaríkjunum og Kanada hafa tekið höndunum saman í leitinni að kafbátnum en skammur tími er til stefnu því súrefnisbirgðirnar í bátnum duga aðeins í 96 klukkustundir.

Um borð eru líklega fimm einstaklingar, tveir starfsmenn og síðan þrír ferðamenn, sem ólmir vildu berja flakið goðsagnarkennda augum. Það er fyrirtækið OceanGate Expeditions sem býður upp á ferðirnar sem eru aðeins á færi útvaldra. Þannig kostar túrinn tæpar 35 milljónir króna á mann, eða 250 þúsund dollara, en alls varir hann í tíu daga. Inni í því verði er ferð niður að skipsflakinu í kafbátnum en köfunin tekur allt að 10 klukkustundir þó að súrefnisbirgðirnar dugi í 96 klukkustundir, eins og áður segir.

Þetta er aðeins þriðji slíki leiðangurinn í sögu fyrirtækisins en tveir aðrir eru ráðgerðir á næsta ári.

Í frétt Daily Mail kemur fram að einn þeirra sem talið er að sé í leiðangrinum sé milljarðamæringurinn Hamish Harding, stjórnarformaður Action Aviation í Dubai, en hann hafi birt færslur á samfélagsmiðlum þar sem hann kvaðst vera spenntur fyrir leiðangrinum og að veðurskilyrði væru orðin hagstæð til þess að leggja í hann.

Ekki liggja fyrir neinar vísbendingar um hvað gerðist aðrar en þær að kafbáturinn hélt af stað og missti svo sambandið við leiðangursskipið, The Polar Prince. Óttast er að kafbáturinn hafi mögulega fest sig í flaki Titanic sem myndi gera björgun illmögulega.