Drög að samgönguáætlun fyrir árin 2024-2038 eru nú aðgengileg í samráðsgátt stjórnvalda.

Í einum kafla áætlunarinnar er farið yfir þær farþegaferjur sem eru í eigu ríkisins. Meðal þeirra er Grímseyjarferjan Sæfari sem smíðuð var 1991 en enurnýjuð 2008.

Eins og fram hefur komið í fréttum undanfarin misseri þykir Sæfari vera kominn talsvert til ára sinna og Grímseyingar hafa kallað eftir því að útveguð verði ný ferja svo hægt verði að tryggja samgöngur við eyjuna og gera íbúum kleift að efla ferðaþjónustu.

Steininn þótti taka úr nýlega þegar ferjan var í slipp frá byrjun apríl fram í byrjun júní. Á meðan voru engar siglingar, fyrir heimamenn og gesti þeirra, í boði til eyjunnar en vöruflutningar voru tryggðir með fiskiskipum. Eftir að ferjan kom úr slipp bilaði hún fljótlega en komst þó í lag samdægurs.

Í samtölum við RÚV hafa íbúar í Grímsey kvartað yfir lélegum samgöngum og kallað eftir breytingum. Sjómaðurinn Svafar Gylfason segir:

„Þetta skip var keypt fyrir tæpum 15 árum og þá var okkur lofað því að þetta yrði aldrei í meira en 10 ár. Nú viljum við bara fara að sjá breytingar.“

Halla Ingólfsdóttir, eigandi ferðaþjónustufyrirtækisins Arctic trip í Grímsey, bætir við:

„Við getum ekki gert neitt ef það er ekki hægt að sinna samgöngum við okkur.“

Hún segir ennfremur:

„Ef það er ekki til ferja í heiminum, önnur en Sæfari, sem getur siglt hérna á milli, sem mér finnst mjög furðulegt, hvers vegna er ekki farið að leggja drög að því að smíða aðra ferju sem ræður við þessa siglingu? En mér finnst furðulegt að þetta gamla grey sé það eina sem getur siglt hérna á milli.“

Biðin lengist

Miðað við drögin að samgönguáætlun munu þau og aðrir Grímseyingar þurfa að bíða lengur eftir nýrri ferju. Í drögunum er ekki gert ráð fyrir fjárheimildum til fjárfestinga í skipum fram til ársins 2029, hvorki til nýsmíði né viðhalds.

Í drögunum er þó tekið fram að:

„Endurnýjun á ferjum ríkisins er brýn og þarf á fyrri hluta tímabilsins (2024-2029 innsk. fréttamanns) að undirbúa og hanna það skip sem næst verður endurnýjað vegna aldurs.“

Það er þó ekki tekið fram hvaða ferju þarf fyrst að endurnýja. Stefnt sé þó að því að nýjar ferjur verði smíðaðar eða keyptar á árunum 2029-2038.