Myndbönd af líkamsárásum ungmenna sem tekin eru í Breiðholti hafa gengið manna á milli á samfélagsmiðlum í dag og vakið mikinn óhug meðal fólks. Í öðru myndbandinu sem tekið er við skiptistöð strætisvagna í Mjódd má sjá stúlku skella annarri í götuna og lemja hana liggjandi í götunni. Þegar þriðja stúlkan tjáir sig með orðum til gerandans þá tekur gerandinn sig til, lemur hana einnig í götuna og heldur áfram barsmíðunum þegar hún er komin í götuna. Hópur ungmenna stendur í kring og skiptir sér ekkert af, en nokkrir taka líkamsárásirnar upp á síma sína. Hættir stúlkan ekki fyrr en fullorðin kona gengur að og skiptir sér af. 

„Ég sat inn í strætó og sá þetta gerast. Ég hljóp út úr strætó til að stoppa þetta. Einnig kom ég stelpunum inn í strætó,“ segir konan við DV.

Í hinu myndbandinu sem tekið er upp við söluturninn Hraunberg mun sama stúlkan vera að verki, þar sem hún lemur aðra stúlku. Eins og í fyrra myndbandinu eru einhver ungmenni sem fylgjast með, skipta sér ekki af, en taka líkamsárásina upp á síma.

Blaðamaður sendi myndböndin áfram til lögreglu og fékk skilaboð til baka: „Lögreglan er meðvituð og hefur brugðist við í þessu máli sem og fleirum.“

Myndböndin vekja hörð viðbrögð

Færslu konunnar sem fyrst vakti athygli á málinu hefur verið deilt rúmlega 400 sinnum í dag og fjöldi athugasemda skrifaðar undir. Fyrra myndbandinu hefur nú verið eytt úr færslunni. Í athugasemdum má sjá að fólk er miður sín yfir atvikunum, nokkur fjöldi segir að um foreldravandamál sé að ræða og þeir myndu ekki hugsa sig tvisvar um að skamma börn sín myndu þau haga sér með þessum hætti, aðrir segja að lögreglan viti af vandamálinu en aðhafist lítið sem ekkert. 

Kona sem býr í Breiðholti segir: „Því miður er þetta orðið daglegt brauð hér alla daga. Þessir krakkar koma úr öllum hverfum í Reykjavík, Kópavogi og annarsstaðar frá. Þau safnast saman í Mjódd og Hraunbergs sjoppu. Þau eru mætt í Mjódd eftir kl 16 og eru þarna þangað til er lokað, “ skrifar konan og bætir við: 

„Það sem vantar er úrræði og inngrip fyrir þessa krakka. Ég gaf mig á tal við nokkra í gær, mikið af þeim er að koma frá brotnu heimili, ofbeldi og vanlíðan. Mikið af þessum börnum er þegar í kerfinu, en kerfið er ekki að grípa þau eða hjálpa, heldur setja þau aftur inn í aðstæðurnar. Þetta ástand sem hér ríkir í Breiðholtinu hefur versnað síðustu vikunnar og á bara eftir að enda illa ef það verður ekki gert inngrip!!“