Margrét Friðriksdóttir, stofnandi og ritstjóri fjölmiðilsins Fréttin.is, hefur verið sakfelld fyrir líflátshótun gegn Semu Erlu Serdar, baráttukonu og stofnanda hjálparsamtakanna Solaris.
Dómurinn hefur ekki verið birtur en saksóknari Lögreglustjórans í Reykjavík hefur staðfest í tölvupósti til DV að Margrét hafi verið sakfelld og dæmd í 30 daga skilorðsbundið fangelsi.
Brotið varðar 233. grein almennra hegningarlaga en hún hljóðar svo:
„Hver, sem hefur í frammi hótun um að fremja refsiverðan verknað, og hótunin er til þess fallin að vekja hjá öðrum manni ótta um líf, heilbrigði eða velferð sína eða annarra, þá varðar það sektum … 1) eða fangelsi allt að 2 árum.“
Atvikið átti sér stað fyrir utan Benzin Cafe við Grensásveg sumarið 2018, en Margrét veittist að Semu Erlu er hún kom á staðinn.
Margrét hótaði Semu Erlu með orðunum: : ,,Ég drep þig fokking ógeðslega tíkin þín“ eða „Im gonna kill you, you fucking bitch“. Í ákæru segir að hótunin hafi verið til þess fallin að vekja hjá Semu Erlu ótta um líf sitt, heilbrigði og velferð.
Í dómum kemur fram að Margrét hefur einu sinni hlotið dóm og tvisvar gengist undir lögreglustjórasátt vegna umferðarlagabrota. Sá sakaferill hafði ekki áhrif á dómsniðurstöðuna.
Við ákvörðun refsingarinnar var tekið tillit til þess hve langt er liðið frá atvikinu, eða um fimm og hálft ár.
Fyrir dómi kvaðst Margrét hafa orðið reið þar sem Sema Erla hefði, í gegnum símtal, látið vísa henni og kærasta hennar út af staðnum. Hafi hún verið á leiðinni á staðinn ásamt sex öðrum manneskjum. Þennan framburð mat dómari ekki trúverðugan en telur að Sema Erla hafi ekki vitað að Margrét væri á staðnum:
„Af útprentunum af samskiptamiðlum sem liggja frammi í málinu verður ekkert ráðið sem réttlætt getur háttsemi ákærðu eða gert hana refsilausa. Þvert á móti verður af þeim ráðið að ákærða hafi um langt skeið látið ýmis óviðurkvæmileg orð falla um brotaþola. Þá bendir framburður vitna fyrir dóminum ekki til þess að ákærða hafi haft ástæðu til að telja sér ógnað. Brotaþoli virðist ekki hafa vitað af því að ákærða væri á staðnum og framburður ákærðu um að brotaþoli hafi komið ásamt mörgum konum virðist ekki eiga við rök að styðjast. Þá verður ráðið af framburði vitna að brotaþoli hafi verið róleg og reynt að fá ákærðu til að stilla sig en ákærða hafi hins vegar verið æst og jafnvel verið orðin það inni á veitingastaðnum áður en hún hitti brotaþola.“
Þá segir ennfremur í niðurstöðu dómsins:
„Samkvæmt 233. gr. almennra hegningarlaga nr. 19/1940 varðar það sektum eða fangelsi allt að tveimur árum að hafa í frammi hótun um að fremja refsiverðan verknað, og hótunin er til þess fallin að vekja hjá öðrum manni ótta um líf, heilbrigði eða velferð sína eða annarra. Við mat á því hvort ummæli ákærðu falli undir ákvæðið skiptir ekki máli hvort ákærða ætlaði sér í raun að láta verða af hótunum sínum heldur hvort hótunin var hlutrænt séð til þess fallin að vekja ótta hjá brotaþola um líf sitt og velferð. Líflátshótanir eru í eðli sínu til þess fallnar að vekja ótta. Brotaþoli greindi frá því að hún hefði óttast ákærðu, sérstaklega í ljósi fyrri framkomu hennar í sinn garð. Þá hafa vitni staðfest að henni hefði verið brugðið og hún verið óttaslegin. Í ljósi alls framangreinds verður ákærða sakfelld og er háttsemi hennar rétt heimfærð til refsiákvæða í ákæru.“
Auk 30 daga skilorðsbundins fangelsis var Margrét dæmd til að greiða verjanda sínum, Arnari Þóri Jónssyni, rétt rúma milljón króna í málsvarnarlaun.
Margrét neitar að taka út grófa Facebook-færslu þrátt fyrir beiðni dómarans
Fréttin hefur verið uppfærð
