Líklegt er að Pútín reyni að forðast að taka áhættusamar ákvarðanir sem geta ógnað völdum hans eða leitt til stigmögnunar stríðsins eða dregið aðrar þjóðir inn í það. Þetta er mat bandarísku hugveitunnar Institute for the Study of War (ISW) sem segir að skipti hann engu máli að til að sigra Úkraínu þurfi hann enn meiri herafla en nú er.
Segir ISW að ef Pútín vilji ná „hámarks og óraunhæfum markmiðum“ sínum þurfi hann að taka frekari áhættu til að eygja von um árangur.
ISW segir að Kremlverjar hafi vonað og reiknað með að þeir myndu sigra Úkraínu á nokkrum dögum og ná Kyiv á sitt vald og bola úkraínsku ríkisstjórninni frá völdum. Það gerðist ekki eins og allir vita og enn er barist, tæpu ári eftir að innrásin hófst. ISW segir að þrátt fyrir þetta hafi Pútín verið hikandi við að fyrirskipa þær erfiðu breytingar, sem þarf að gera á rússneska hernum og samfélaginu, sem séu líklega nauðsynlegar til að bjarga stríðsrekstrinum.
Segir hugveitan að Pútín hafi „stöðugt hunsað, frestað eða aðeins að hluta innleitt“ þær ákvarðanir sem séu nauðsynlegar til að innrásin heppnist. Hann hefur til dæmis verið hikandi við að grípa til fullrar herkvaðningar. Hann hunsaði einnig ítrekaðar óskir í maí um að kalla varaliða til starfa í hernum eftir dýrkeypta sigra Rússa við að ná Severodonetsk og Lysychansk á sitt vald.
ISW segir að Pútín sé hræddur við að reita almenning til reiði og vilji halda áfram að láta líta út fyrir að stríðið sé takmarkað og því taki hann ekki áhættusamar ákvarðanir.
