Síðastliðinn laugardag átti DV fund með nokkrum pólskum konum sem hafa flestar verið hér á landi í um mánaðartíma eftir að hafa ráðið sig til starfa hjá hreingerningarfyrirtæki. Konurnar hafa ekki fengið greidd laun og ekki hefur verið staðið í skilum með gistingu fyrir þær. Konurnar sem DV ræddi við eru fimm en munu vera hluti af stærri hópi sem segist eiga um sárt að binda vegna viðskipta við manninn sem í hlut á. Þær heita Martyna Ciecholińska, Alina Kottlewska, Małgorzata Olszewska, Aleksandra Trzopek og Natalia Jakrzewska.
Maðurinn sem réði þær til starfa heitir Adamka Przemyslaw. Hann er eftirlýstur í Póllandi fyrir fjársvik samkvæmt þessari tilkynningu. DV ræddi við manninn og sjónarmið hans koma fram síðar í greininni.
Konurnar lýstu því fyrir DV að þær hafi svarað atvinnuauglýsingu á netinu og ráðið sig til starfa hjá fyrirtæki sem bar heitið „Cleanhomes ehf.“ Það fyrirtæki er raunar ekki til en einhvers konar deild undir þessu heiti var starfrækt undir fyrirtækinu PR Hús. Konunum var sagt að starf þeirra myndi felast í þrifum á Hótel Vogum. Einnig var þeim sagt að þær ættu að sinna þrifum í verslunum Krónunnar.
Þegar til átti að taka voru þessi verkefni ekki fyrir hendi og var konunum tjáð að ekki væri búið að landa samningum við þessa verkkaupa eins og til hefði staðið. Konurnar voru engu að síður komnar í bindandi launasamband við PR Hús og voru þær látnar þrífa og mála skrifstofuhúsnæði fyrirtækisins. Þær segjast hins vegar hafa að mestu leyti verið verkefnalausar.
Þær eru í raun líka húsnæðislausar. Þeim var lofað samastað en var síðan tjáð að íbúðir sem þær ættu að búa í væru ekki tilbúnar og voru þær vistaðar á hóteli. Gisting hefur hins vegar ekki verið greidd fyrir konurnar nema að litlu leyti. Þær voru eina nótt á einu hóteli í Reykjavík en þurftu að greiða fyrir þá gistingu með þrifum og síðan hafa sig á brott. Þær hafa að mestu haldið til á öðru hóteli í Reykjavík en þar hefur eigandanum tekist með eftirgangsmunum að innheimta um 35% af gistikostnaðinum. Í augnablikinu gista konurnar á staðnum upp á náð eigandans.
Konurnar segjast engin laun hafa fengið greidd. Þeim hefur hvað eftir annað verið tjáð að launin séu á leiðinni, um sé að ræða einhvern tæknilegan vanda varðandi samskipti við banka. DV hefur undir höndum fjölmörg skjáskot af samkiptum í þessa veru, flest eru á pólsku og vélþýdd á ensku. Einnig hefur DV undir höndum skjáskot af ráðningarsamningum nokkurra kvennanna.
Síðast var konunum lofað launagreiðslu í gær en í morgun bárust þeim skilaboð í stíl við fyrri loforð. Hér gefur að líta skjáskot af þeim samskiptum:
Samkvæmt ráðningarsamningum eru konurnar skráðar í Eflingu og hafa þær kært framgöngu PR-Húsa og Adamka til Eflingar. Ennfremur hafa þær tilkynnt málið til lögreglu og munu leggja fram formlega kæru hjá Lögreglunni á höfuðborgarsvæðinu kl. 15 í dag.
„Við erum peningalausar, atvinnulausar, án húsnæðis. Hvað eigum við að gera?“ Fjórar af konunum fimm sem DV ræddi við greiddu sjálfar fyrir fargjaldið til Íslands og þær eiga ekki peninga fyrir farinu heim. Sú sem fékk farið greitt þurfti reyndar að greiða aukagjald fyrir farangur. Aðspurðar segjast konurnar fimm þó miklu fremur vilja vinnu og húsnæði hér á landi en farmiða heim til Póllands því þær þyrstir í vinnu og eru samkvæmt heimildum DV annálaðar fyrir dugnað.
„Við viljum vinna og okkur er sagt að atvinnuástand sé gott hérna. Við vonum innilega að einhver heiðarleg fyrirtæki vilji ráða okkur til starfa,“ segja þær.
DV ræddi við Adamka vegna málsins á laugardaginn. Hann var afar ósáttur við að greinaskrif væru í uppsiglingu og sagðist hafa staðið heiðarlega að málum. Hann sagði að samningar við verkkaupa, sem hefðu tafist, væru í burðarliðnum og ennfremur að launagreiðslur myndu berast á mánudag. Starfskona á vegum PR-Húsa hafði síðan samband við DV og skýrði frá því að konurnar hefðu stolið sendibíl í eigu fyrirtækisins. Um er að ræða bíl sem konurnar komu á til gistingarinnar á áðurnefndu hóteli. Samkvæmt gögnum sem DV hefur undir höndum var bíllinn gerður upptækur í tengslum við gjaldþrot fyrirtækisins Furuverk ehf. sem var í eigu Adamka, en fyrirtækið var tekið til gjaldþrotaskipta í september 2022. DV hefur staðfestar heimildir frá fyrstu hendi um að umræddur bíll sé í eigu þrotabúsins.
DV barst bréf frá PR Húsum í morgun þar sem segir að launagreiðslur til kvennanna séu á leiðinni. Ennfremur séu frásagnir um vandamál varðandi gistingu byggðar á misskilningi. Ráðningarsamningur hafi tekið gildi 10. janúar og launagreiðslur hafi því átt að berast 10. febrúar. Vegna vandræða varðandi bankareikning fyrirtækisins hafi greiðslurnar tafist lítillega.
Varðandi spurningar DV um sakamál gegn Adamka í Póllandi er bent á að lögfræðingur hans vinni að úrlausn málsins en ekki sé heimilt að leggja fram nein gögn í því að svo stöddu en PR Hús segjast fullviss um að ásakanirnar séu rangar og málið verði fellt niður.
