Arnar Þór Jónsson, lögmaður og verjandi, Margrétar Friðriksdóttur, ritstjóra Fréttarinnar, er hættur sem lögmaður hennar. 

DV hafði heimildir fyrir því í morgun að Arnar Þór hefði sagt sig frá máli Margrétar í kjölfar Facebook-færslu sem hún skrifaði í gærkvöldi,  kjölfar úrskurðar Héraðsdóms Reykjavíkur í gær.

Arnar Þór vildi ekki staðfesta þetta í samtali við DV í morgun en tók fram að samfélagsmiðlar væru ekki rétti staðurinn til að reka dómsmál.

Margrét neitar að taka út grófa Facebook-færslu þrátt fyrir beiðni dómarans

Fréttablaðið birti fyrir stuttu frétt um að Arnar Þór hefði sagt sig frá málinu, segir í fréttinni að það hermi heimildir Fréttablaðsins.

Margrét var sakfelld í gær í Héraðsdómi Reykjavíkur fyrir lífslátshótun gegn Semu Erlu Serdar, baráttukonu og stofnanda hjálparsamtakanna Solaris. Var Margrét dæmd til 30 daga skilorðsbundinnar fangelsisvistar og þarf að greiða lögmanni sínum um milljón í málsvarnarlaun.

„Ég vil segja það að fólk á auðvitað ekki að reka mál sín annars staðar en bara fyrir dómi og ef það kýs að gera það þá er það ekki á mína ábyrgð eða á ábyrgð lögmanna,“ segir Arnar Þór í samtali við Fréttablaðið og bætir við: „Ef fólk kýs að reyna að reka mál annars staðar þá má líta svo á að þar með sé búið að rjúfa trúnaðarsamband, það séu brostnar forsendur fyrir því að lögmaður sinni þessu hlutverki áfram.“

Margrét skrifaði nýja færslu á Facebook fyrir stuttu þar sem hún segir frá að Arnar Þór hafi sagt sig frá máli hennar vegna færslu gærkvöldsins: 

„Langar að taka hér fram að Arnar Þór Jónsson tengist innleggi mínu í gær á engann hátt, hann sagði sig frá málinu vegna færslunar, en að mínu viti er kona sem setur svartan blett á dómstóla og dæmir mig í fangelsi, þrátt fyrir að vitni hafi staðfest að Sema hafi átt upptökin á riflildinu, óheiðarleg og ómerkileg svo vægt til orða tekið,“

 skrifar Margrét og viðhefur síðan orðalag sem DV hefur ekki eftir.

Margrét hefur fjórar vikur til að áfrýja dómnum, Arnar Þór svarar Fréttablaðinu aðspurður að ekki sé búið að áfrýja.