Þann 5. desember var þingfest í Héraðsdómi Reykjavíkur mál sem héraðssaksóknari hefur höfðað gegn manni fyrir kynferðisbrot. Um lokað þinghald er að ræða.

Maðurinn er sakaður um að hafa aðfaranótt föstudagsins 12. ágúst árið 2022, fyrir utan veitingahús í Reykjavík, tekið buxnastreng sinn niður þannig að kynfæri hans blöstu við og hrist kynfæri sín fyrir framan konu. „…framangreind háttsemi var til þess falin að særa blygðunarkennd hennar,“ segir í ákæru.

Meint brot varðar 209. grein almennra hegningarlaga, en hún er svohljóðandi:

„Hver sem með lostugu athæfi særir blygðunarsemi manna eða er til opinbers hneykslis skal sæta fangelsi allt að 4 árum, en [fangelsi allt að 6 mánuðum] eða sektum ef brot er smávægilegt“

Héraðssaksóknari krefst þess að maðurinn verði dæmdur til refsingar og greiðslu alls sakarkostnaðar. Í ákærunni kemur ekki fram miskabótakrafa frá konunni, eins og algengt er í málum af þessu tagi.