Hannes Hólmsteinn Gissurarson, prófessor emeritus í stjórnmálafræði í Háskóla Íslands, fer mikinn á Facebook-síðu sinni í dag en þar sakar hann ýmsa nafntogaða einstaklinga eins og Rósu Björk Brynjólfsdóttur, fyrrum alþingiskonu og núverandi verkefnastjóra í forsætisráðuneytinu, sem og Guðmund Ólafsson, hagfræðing og fyrrverandi lektor, um að hafa lekið fréttum um sig í fjölmiðla á árum áður.
Tilefni skrifa Hannesar er frétt Heimildarinnar á dögunum sem snerist um fyrirspurn sem miðillinn sendi til lögreglunnar um hvort og hvernig tekið yrði á meintum leka ónefnds lögreglumanns í vefmiðilinn Nútímann um ástand þingkonunnar Arndísi Önnu K. Gunnarsdóttur þegar hún var handtekin á skemmitstaðnum Kíki á dögunum. Fréttin hefur vakið talsverða athygli í ljósi þess að miðlar þar sem rannsóknarblaðamennska er í hávegum höfð treysta yfirleitt á að slíkum gögnum sé lekið til þeirra og því þykir það afar einkennilegt að fókus Heimildarinnar sé hinum meinta leka frekar en að rannsaka hvort að áðurnefndur þingmaður hafi gerst brotlegur við lög eða mögulega siðareglur Alþingis.
Áður höfðu fjölmiðlamaðurinn Snorri Másson sem og pistlahöfundar Viðskiptablaðsins skotið á Heimildina fyrir umfjöllunina en í morgun var gagnrýninni gerð skil á síðum Morgunblaðsins. Í tilefni af því tók Hannes sig til og birti færslu þar sem hann fer yfir fréttir um hann sem lekið hefur í fjölmiðla og í sumum tilvikum hverja hann telur að hafa verið á bak við lekana.
„Nú er Heimildin að reyna að finna heimildarmenn að fréttinni um handtöku þingmanns Pírata. Venjulega vilja fréttamenn vernda heimildarmenn og súpa sjálfir af lekunum. Það er ekki seinna vænna að snúa sér að þeim, sem leka. Ég hef margsinnis verið fórnarlamb leka, sem voru til þess gerðir að koma á mig höggi persónulega, spilla fyrir mér, ekki til að sinna upplýsingaskyldu fjölmiðla, og ég veit um heimildarmennina í nánast öllum málunum,“ skrifar Hannes Hólmsteinn og hefur síðan neðangreinda upptalningu.
1) Trúnaðaráliti dómnefndar um mig 1988 var lekið í Helgarpóstinn (og það var ekki Þorbjörn Broddason, sem lak í því, eins og ég hélt um skeið, en mágur hans var blaðamaður á Helgarpóstinum),
2) Rangri frétt um mig (að ég hefði ekki skilað skýrslu um skattamál) var lekið úr fjármálaráðuneytinu í Stöð tvö og til Inga Freys Vilhjálmssonar. Rósa Björk lak þessu, en hún var þá upplýsingafulltrúi fjármálaráðuneytisins.
3) Rangri frétt um mig og raunar samkennara mína í stjórnmálafræði (að við hefðum krafist þess, að Svanur Kristjánsson yrði rekinn) var lekið í DV. Guðmundur Ólafsson, vinur Svans, lak þessu, en fréttin brenglaðist í meðförum hans.
4) Furðufrétt um mig var lekið á Stöð tvö og víðar (að auk ýmissa stórfyrirtækja í opinberri eigu væri ég eini Íslendingurinn, sem nyti ríkisábyrgðar á American Express greiðslukorti mínu!). Sá, sem lak, starfaði þá hjá Lánasýslu ríkisins.
5) Frétt um styrki Landsbankans til ráðstefnuhalds, sem ég sá um, var lekið. Ég gerði ekkert í málinu. Sá, sem lak, starfsmaður bankans, var, held ég, dæmdur í fangelsi fyrir annan leka um aðra aðila.
6) Frétt um, að Ritið hefði hafnað ritgerð eftir mig, var lekið til Inga Freys Vilhjálmssonar. Það var ekki ritnefndin, sem lak, heldur annar aðili (en eflaust mun Ingi Freyr upplýsa þetta, úr því að tímarit hans ætlar að hafa upp á heimildarmönnum frétta! En ég veit, hver lak).
7) Frétt af samningi, sem ég gerði við Háskólann, um breytingar á starfstilhögun (í fullri sátt beggja aðila og án nokkurrar nauðungar), var lekið, og það gerði einn samkennari minn, en í meðförum hennar brenglaðist fréttin stórlega og varð mjög ónákvæm. Einnig eru til dæmi um, að samkennari minn hafi haft samband við fjölmiðla og viljað birta neikvæðar fréttir um mig, en fjölmiðlarnir höfðu ekki áhuga og létu mig vita. Fleira mætti nefna. Mér datt þetta sisvona í hug, úr því að Heimildin er að grafa upp heimildarmenn frétta!
Skrifar prófessorinn og klikkir út með upphrópun unga fólksins „haha“.
