Margrét Þórhildur Danadrottning tilkynnti þegnum sínum í nýársávarpi sínu fyrir stundu að hún muni afsala sér krúnunni 14. janúar næstkomandi, þegar 52 ár verða liðin frá því að hún tók við sem drottning Danmerkur við fráfall föður síns, Friðriks 9.
Drottningin sagðist ekki lengur hafa sama úthald og heilsu og fyrr, vísaði til þess að hún undirgekkst bakaðgerð á líðandi ári. Hún sagði að þetta hefði vakið hana til umhugsunar um það hvort ekki væri rétt að rétta keflið til nýrrar kynslóðar.
Friðrik, krónprins, verður því Friðrik 10. Danakonungur sunnudaginn 14. janúar næstkomandi. Hann er fyrsti Danakonungurinn í margar aldir, sem engin tengsl hefur við Ísland, en þegar Margrét fæddist var hún krónprinsessa Íslands því faðir hennar var síðasti konungur Íslands áður en Ísland varð lýðveldi á Þingvöllum 17. júní 1944. Vegna tengslanna við Ísland var henni gefið hið þjóðlega nafn, Þórhildur.
Segja má að með hvarfi Margrétar Þórhildar af dönsku krúnunni séu öll tengsl Íslands við dönsku krúnuna endanlega horfin.
