Húsið þar sem fjögur ungmenni voru myrt í Idaho fyrir rúmi ári hefur verið rifið. Fjölskyldur hinna látnu eru ósátt þar sem réttarhöldin hafa ekki enn þá farið fram. Verið sé að eyðileggja sönnunargögn fyrir réttarhöldin í sumar.
Morðin á ungmennunum fjórum í bænum Moscow í Idaho þann 13. nóvember árið 2022 vöktu mikinn óhug. Fórnarlömbin voru öll háskólanemar sem voru stungin margsinnis til bana aðfaranótt þessa dags í húsnæði sem þau höfðu á leigu. Líklega á meðan þau voru sofandi.
Þetta voru þau Madison Mogen, Kaylee Goncalves, Ethan Chapin, og Xana Kernodle sem fundust öll í rúmunum sínum.
Tvær aðrar stúlkur, einnig háskólanemar, voru í húsinu þegar þetta gerðist en sváfu alla nóttina. Þær gerðu lögreglu viðvart þegar þær vöknuðu og sáu blóðbaðið.
Talið var að morðinginn eða morðingjarnir hefðu vitað aðgangsnúmerið að húsinu því að engin merki voru um innbrot. Mikil óhugnaður greip um sig í háskólabænum, sem telur aðeins 25 þúsund sálir, og málið varð að stóru fréttamáli út um allan heim.
Það var ekki fyrr en eftir jólin þetta ár, um einum og hálfum mánuði eftir morðin, sem lögregla handtók mann að nafni Bryan Christopher Kohberger, 28 ára, fyrir morðin í Moscow. Hann var doktorsnemi í afbrotafræði, sem nýlega hafði verið látinn hætta kennslu vegna afbrigðilegrar hegðunar.
Kohberger var handtekinn í Pennsylvaníu, í um 4 þúsund kílómetra fjarlægð frá vettvangi glæpsins. Það voru ábendingar um hvíta Hyundai Elantra bifreið hans sem komu lögreglunni á sporið.
Hvorki saksóknari né verjandi Kohberger gerðu athugasemdir við að leiguhúsnæðið þar sem morðin voru framin væri jafnað við jörðu núna í vikunni.
Samkvæmt fjölmiðlinum News Nation hafa fjölskyldur tveggja fórnarlambanna, Goncalves og Kernodle, mótmælt þessari aðgerð. Ekkert hafi legið á því að rífa húsnæðið fyrr en eftir að réttarhöldin væru búin. Húsnæðið sjálft og munir þar inni gætu enn þá hjálpað til við að upplýsa glæpinn. Nú sé hugsanlega búið að eyðileggja mikilvæg sönnunargögn í málinu.
Að sögn lögregluyfirvalda hafa hins vegar öll sönnunargögn verið tekin út úr húsinu. Þá hafa einnig verið gerð þrívíddar líkön af húsinu og ótal ljósmyndir teknar inn í því.
Fjölskyldur segja þetta hins vegar ekki nóg. Í sumum réttarhöldum hefur verið farið með kviðdómendur á vettvang morða til þess að þeir geti betur áttað sig á aðstæðum. Þá er ekki hægt að ná ýmsum hlutum í þrívíddarlíkön eða ljósmyndir. Til að mynda upplýsingar um hljóðvist húsa. Hafa talsmenn fjölskyldnanna lýst niðurrifinu sem „geðveiki.“
Yfirvöld segja hins vegar að þegar húsið hafi verið rifið hafi ýmsu verið breytt síðan morðin voru framin. Þess vegna hefði kviðdómi aldrei verið leyft að fara þarna inn. Þá hefði verið mikill þrýstingur frá háskólasamfélaginu að rífa húsið. Það skapaði mjög óþægilegar minningar fyrir nemendur.
Réttarhöldin yfir Kohberger hefjast í sumar. Ákveðið var að halda þau þegar háskólanemar eru í sumarfríi.
