Lögreglan á höfuðborgarsvæðinu hefur sent frá sér tilkynningu vegna frétta fjölmiðla af lýsingu Þórunnar Helgadóttur og stjúpsonar hennar Brian á samskiptum hans við lögregluna síðdegis á aðfangadag. Þau halda því fram að Brian hafi verið handtekinn fyrir litlar sem engar sakir en ástæðan sem gefin hafi verið upp sé sú að Brian hafi ekki haft nein skilríki á sér. Þórunn greindi frá málinu á Facebook-síðu sinni og sagði blasa við að Brian, sem er 28 ára gamall og frá Kenía, hafi verið handtekinn vegna þess að hann sé dökkur á hörund.
Í tilkynningunni segir Lögreglan á höfuðborgarsvæðinu að hún kannist í engu við þessa atvikalýsingu Þórunnar og Brian. Hægt sé að upplýsa að karlmaður á þrítugsaldri hafi verið handtekinn í Hlíðunum í Reykjavík eftir hádegi á aðfangadag í kjölfar tilkynningar um mann sem var sagður vera sofandi í bíl og hafi bíllinn verið í gangi í töluverðan tíma.
Lögreglan hafi haldið á vettvang og fundið bílinn en þar hafi maður vissulega reynst vera sofandi. Hann hafi verið vakinn og því næst spurður um persónuupplýsingar eins og venja sé. Maðurinn hafi neitað að gefa þær upp þrátt yfir margítrekaðar beiðnir lögreglunnar. Hann hafi verið færður á lögreglustöð en verið áfram tregur til að veita persónuupplýsingar og verið jafnframt margsaga. Reynt hafi verið að komast að heimilisfangi mannsins en hann ekki verið hjálplegur í þeim efnum. Að lokum hafi lögreglunni tekist að koma manninum til síns heima og sannreyna hver hann væri.
Einnig segir í tilkynningunni að lögreglan leggi sig ávallt fram um að eiga góð samskipti við alla borgara og það hafi einnig átt við í þessu máli. Samskipti við umræddan mann hafi verið tekin upp á búkmyndavélar lögreglumanna og styðji fullyrðingar lögreglunnar um atburðarásina þegar maðurinn var handtekinn í Hlíðunum á aðfangadag.
