Ný rannsókn vísindamanna við Texas háskóla í Bandaríkjunum sýnir að börn hætta að trúa á jólasveininn um 8 ára aldur.

Það var sálfræðingurinn Candice Mills sem leiddi rannsóknina. 48 börn á aldrinum 6 til 15 ára tóku þátt og svöruðu ýmsum spurningum um hvort þau trúðu á jólasveininn og hvernig það lét þeim líða þegar þau komust að því að hann er ekki til.

Foreldrar barnanna svöruðu einnig spurningum. Meðal annars um hvernig þeir héldu blekkingunni um tilvist jólasveinsins á lofti.

Einnig voru 383 fullorðnir einstaklingar spurðir út í hvaða áhrif þessi uppgötvun hafði á þá.

„Ef foreldrar vilja komast hjá því að uppgötvunin um jólasveininn hafi slæm áhrif á börnin þá er gott að vita að börn byrja að efast um tilvist hans um sjö eða átta ára aldur,“ sagði Mills við bresku sjónvarpsstöðina Sky. „Gögnin sýna að þeim mun eldri sem þau komast að sannleikanum þeim mun líklegra er að þetta hafi slæm áhrif á þau.“

Flest börn komast að sannleikanum frá öðrum en foreldrum. Sum uppgötvuðu þetta sjálf áður en nokkur sagði þeim þetta, með því að nota rökhugsun.

Um þriðjungur barna sýna neikvæðar tilfinningar eftir uppgötvunina. Sérstaklega á þetta við þegar foreldrarnir eru búnir að gera mikið til þess að halda blekkingunni á lofti.