Sigurður Óli Þórleifsson, og nágrannar hans við Víkurbraut í Grindavík, fengu í dag tilkynningu um að húsin séu gjörónýt eftir jarðhræringarnar í nóvember. Hins vegar sé ekkert hægt að greiða út því að svör vantar frá Grindavíkurbæ um framtíðaráform á staðnum.
Enn þá þurfa íbúar að greiða opinber gjöld og þjónustugjöld af húsunum og lífeyrissjóðir eru byrjaðir að setja fólk sem ekki hefur greitt af húsnæðislánum í Grindavík á vanskilaskrá.
„Fólk er skilið eftir í lausu lofti. Það hrúgast enn þá inn reikningar af húsinu,“ segir Sigurður Óli á hús við Víkurbraut 40, sem stendur á sigdalnum sem myndaðist þann 10. nóvember. Fjölskylda hans hefur dvalið hjá vinafólki á Selfossi eftir að bærinn var rýmdur.
Í dag fékk hann símtal frá Náttúruhamfaratryggingu Íslands (NHTÍ) um að altjón hefði orðið á húsinu hans. Nágrannar hans fengu einnig sams konar símtal í dag. NHTÍ geti hins vegar ekkert meira gert að svo stöddu því að svör vanti frá Grindavíkurbæ um hvað eigi að gera á þessum stað í framtíðinni.
„Við höfum heyrt það frá bænum og Huldu Ragnheiði forstjóra Náttúruhamfaratryggingar að bæjarmyndin verði önnur,“ segir Siguður Óli. Þessi skilaboð virðist ekki hafa farið formlega leið frá Grindavíkurbæ til NHTÍ.
Sigurður er ekki aðeins ósáttur við þessar tafir og óvissu sem íbúar eru látnir búa við heldur einnig að þeir séu látnir greiða opinber gjöld, þjónustugjöld og afborganir af húsnæðislánum fyrir ónýt hús.
Sigurður segist til dæmis vera að borga 45 þúsund krónur í fasteignagjöld í hverjum mánuði. Einnig þurfti hann að borga hitaveitu og rafmagnsgjöld af húsinu. Þá hafa lífeyrissjóðirnir ekki sýnt sama skilning á ástandinu og bankarnir og eru enn þá að rukka.
„Ég fékk tilkynningu frá þeim í gær þar sem þeir segjast skilja að það sé álag á Grindvíkingum en þeir myndu samt senda út vanskilaseðla í dag,“ segir Sigurður. „Ég vísvitandi greiddi ekki af láninu 1. desember. Það var ekki vegna fjárhagsstöðu minnar. Ég vil að húsið verði greitt upp miðað við stöðuna 10. nóvember.“
Fannar Jónasson, bæjarstjóri Grindavíkur, segir að verið sé að vinna stíft með NHTÍ að þessum málum eins og undanfarnar vikur. Matið er gert að frumkvæði NHTÍ en aðkoma Grindavíkurbæjar komi í framhaldi af því.
„Það mun ekki standa á okkur að vinna þetta áfram. Það er ekki búið að boða til neins sérstaks samráðsfundar enn þá. En við vitum af þessari vinnu og hún er langt komin,“ segir Fannar.
Aðspurður um hvort sé verið að tala um vikur eða mánuði segist Fannar ekki geta svarað því. Þessu verði flýtt eins og hægt sé. Hins vegar sé mikill fjöldi fólks í matsgerðum og úrvinnsla þeirra gagna taki tíma.
Þá segist Fannar ekki geta svarað því hvort eðlilegt sé að fólk sé að borga opinber gjöld af ónýtum húsum.
„Við erum að vinna þetta heildstætt á grundvelli fjárhagsáætlunar bæjarins. Það er reynt að mæta þeim óskum sem fram koma innan þess svigrúms sem bærinn hefur varðandi fasteignagjöld samkvæmt lögum,“ segir hann.
Engin ákvörðun um fasteignagjöld næsta árs hafi verið tekin og Grindavíkurbær hafi, í ljósi aðstæðna, fengið frest til 15. janúar til að skila gögnum.
„Menn verða að átta sig á því hvernig ástandið er hérna og hversu erfiður viðfangs þessi atburður hefur reynst bæjarfélaginu. Það stendur ekki á okkur að reyna að vinna þetta eins hratt og við getum, með hagsmuni íbúanna í huga að sjálfsögðu,“ segir Fannar.
Fundað verður á milli jóla og nýárs og eftir því sem þurfa þykir.
