Hraunflæði í Sundhnúkagígaröðinni er núna fjórðungur af því sem það var í gærkvöldi þegar gosið hófst. Engu að síður er flæðið mun meira en var í upphafi hinna þriggja eldgosanna á Reykjanesskaga.
Hraunflæðið er nú um 100 rúmmetrar á sekúndu en var um 400 þegar mest lét í gærkvöldi. Þá hefur gosopum fækkað úr fimm niður í þrjá. Flæðið var svo mikið í nótt að lítið fjall hefur myndast, kolsvart og rýkur úr því.
Samkvæmt tilkynningu Eldfjalla og náttúruvárhópi Suðurlands virðist eldgosið hafa náð stöðugu ástandi og gosórói nokkuð jafn.
„Samhliða upphafi eldgossins seig land nokkuð við Svartsengi þar sem landris hafði verið stöðugt síðustu vikur. Má því ætla að kvika hafi hlaupið þaðan úr lagganginum (sillunni) sem þar hefur myndast og komið eldgosinu af stað í gærkvöldi,“ segir í henni.
Frá 10. nóvember, þegar hræringarnar í Grindavík voru sem mestar, hafði land risið um 35 sentimetra í Svartsengi. Síðan í gær hefur það sigið um 7 sentimetra.
Samkvæmt nýju hættumatskorti Veðurstofunnar er þó aukin hætta á að ný gosop opnist. Mesta hættan er við þá sprungu sem þegar hefur opnast en mikil hætta er talin á að gosop geti opnast í Grindavíkurbæ sjálfum og þá með litlum fyrirvara. Alls er hættusvæðið nokkuð stórt en þetta nýja kort gildir til 28. desember næstkomandi.
Auk þess sem dregið hefur úr hraunflæði þá hefur syðsta gosopið stöðvast og því rennur nú ekkert hraun suður í átt til Grindavíkur. Mesta hraunflæðið er í norðaustur en hrauntunga rennur einnig til vesturs, norðan við Stóra Skógarfell.
Hvað innviði varðar er það eina sem talið er í hættu nú Grindavíkurvegurinn en miðað við hraunflæðið í dag mun það taka nokkra daga að komast þangað.
Ríkisstjórnin fundaði í morgun og rætt var um hvort að reisa þurfi fleiri varnargarða. Um 80 prósent af þeim görðum sem verið er að reisa í kringum virkjunina Svartsengi og Bláa lónið eru fullgerðir. Fannar Jónasson, bæjarstjóri Grindavíkur hefur lýst skoðun sinni að reisa ætti varnargarð norðan við bæinn til að varna honum frá hrauntungum.
Björgunarsveitir og viðbragðsaðilar biðla til fólks að vera ekki að fara að gosinu. Nokkrum göngumönnum hefur þegar verið snúið við.
Von er á slæmu veðri og hjarn er yfir jarðveginum sem getur verið mjög varasamur yfirferðar. Þá er nokkur gasmengun úr gosinu og fólk sem er þar nærri finnur vel fyrir henni í augum og öndunarfærum.
