Breski vefmiðillinn Daily Mail fjallar um eldgosið sem hófst í Sundhnúkagígum í gærkvöldi. Það kemur kannski ekki á óvart enda er eldgosið áberandi á síðum erlendra netmiðla þennan morguninn.
Á forsíðu Dail Mail blasir þetta við lesendum í efstu frétt:
Í fréttinni er sagt frá spennufíklum sem fóru býsna nálægt gosstöðvunum en erfitt er að átta sig á, miðað við myndirnar, hversu nálægt þeir fóru. Í fréttinni er þó látið að því liggja að einhverjir hafi virt tilmæli Almannavarna um að halda sig fjarri að vettugi. Þá er birt mynd af bílaröð á Reykjanesbraut skömmu eftir að eldsumbrotin hófust en líklegt má telja að einhverjir, en þó ekki allir, hafi viljað komast nærri gosinu.
Þá er vísað í tilkynningu frá lögreglunni á Suðurnesjum í gærkvöldi þess efnis að ökumenn teppi ekki vegi og skapi með því óþarfa hættu.
Í fréttinni er einnig vísað í viðtal Vísis við fjóra unga menn, Jóa, Halla, Stefán og Stefán sem voru mættir á Suðurstrandarveginn í gærkvöldi, stuttu eftir að gosið hófst. Þeir sögðust fara upp að gosi um leið og það gýs í hvert einasta sinn en það eina sem stöðvaði þá núna væri lögreglan.
„Því miður þá komumst við ekki nær. Þetta er eitthvað áhugamál sem við erum búnir að hafa í fjögur ár, að mæta á hvert einasta gos og við höldum áfram að gera það,“ sagði einn úr hópnum í viðtalinu.
Vel á annað þúsund athugasemdir hafa verið skrifaðar við frétt Daily Mail og í mörgum þeirra má finna góðar kveðjur til Íslendinga á þessum viðsjárverðu tímum.
„Guði sé lof að fólk gat komið sér í burtu í tæka tíð,“ sagði einn á meðan annar bætti við: „Ég var þarna í mars. Fallegur staður, fallegt fólk og ég vona að allt fari vel.“ Þá sagði annar: „Guð blessi ykkur, Íslendingar. Passið upp á ykkur.“
