Þann 12. janúar næstkomandi verður aðalmeðferð við Héraðsdóm Reykjavíkur í sérstæðu kynferðisbrotamáli vegna brota frá árinu 2017. Héraðssaksóknari hefur ákært mann fyrir að hafa tvisvar nauðgað sömu konunni það ár og hafa í bæði skiptin notfært sér að konan var sofandi eða meðvitundarlítil og gat ekki spornað við verknaðinum vegna áhrifa áfengis og svefndrunga. Í síðara tilvikinu er tekið fram að atvikið hafi átt sér stað í rúmi konunnar.
Maðurinn er síðan í þriðja lagi sakaður um að hafa útbúið myndskeið af nauðgununum, sett myndefnið á minnislykil og sett minnislykilinn í póstkassa konunnar. Þetta framferði varðar 199. gr. a almennra hegningarlaga, en þar segir:
„Hver sem útbýr, aflar sér eða öðrum, dreifir eða birtir myndefni, texta eða sambærilegt efni, þ.m.t. falsað efni, af nekt eða kynferðislegri háttsemi annars manns án hans samþykkis skal sæta sektum eða fangelsi allt að 4 árum.“
Héraðssaksóknari krefst þess að maðurinn verði dæmdur til refsingar og greiðslu alls sakarkostnaðar.
Fyrir hönd konunnar er gerð miskabótakrafa upp á þrjár milljónir króna.
