„Við erum með raundæmi um einstakling sem er með 44 milljóna króna lán hjá Gildi lífeyrissjóði. Hann fær afborganir af höfuðstóli frystar í þrjá mánuði en enga niðurfellingu á vöxtum og verðbótum, eins og stæði honum til boða ef hann væri með lán hjá banka. Þessi einstaklingur þarf vegna þessa að greiða aukalega 9,2 milljónir af láninu sínu yfir lánstímann. Afborgun af láninu hækkar um rúmlega 5% af mánuði og heildargreiðsla yfir samningstímann einnig. Sjóðurinn græðir á neyð Grindvíkinga,“
Skrifa feðgarnir og Grindvíkingar Einar Hannes Harðarson, formaður sjómanna- og vélstjórafélags Grindavíkur, og Hörður Guðbrandsson, formaður Verkalýðsfélags Grindavíkur, í
Einar Hannes og Hörður hafa gengið í fararbroddi ákalls til banka og lífeyrissjóða um að hjálpa Grindvíkingum, sem standa nú margir frammi fyrir að borga lán af fasteign sinni í Grindavík og þurfa jafnframt að leigja húsnæði til óviss tíma annars staðar.
Dæmið hér að ofan taka feðgarnir sem útskýringu á af hverju þeir fara fram á að lífeyrissjóðir aðstoði Grindvíkinga í neyð og svari ákallinu um að fella niður vexti og verðbætur lána, í það minnsta í þrjá mánuði, líkt og bankar landsins hafa gert.
„Að undanförnu höfum við staðið fyrir ákalli til lífeyrissjóða um að hjálpa Grindvíkingum í neyð. Eins og allir vita stendur heilt bæjarfélag nú frammi fyrir því að þurfa að fara inn á sturlaðan leigumarkað til að búa sér til heimili til skamms tíma. Bankarnir brugðust við ákalli okkar Grindvíkinga um að fella niður vexti og verðbætur næstu þrjá mánuði, til að byrja með. Lífeyrissjóðirnir hafa hins vegar ekki svarað þessu kalli.“
Rekja þeir að fyrsta viðkvæði lífeyrissjóðanna, þegar þessi krafa var fyrst sett fram, var að þeim væri ekki heimilt, vegna þeirra laga og reglna sem þeir starfa eftir, að fella niður vexti og verðbætur. „Fátt var um svör þegar farið var fram á að vísað yrði í þau lög og þær reglur. Núna, mánuði eftir að við þurftum að flýja heimili okkar, er búið að kaupa lögfræðiálit af stofu út í bæ. Niðurstaðan er einmitt sú sem stjórnendur Gildis vildu. Hvað ætli Gildi hafi greitt fyrir þetta álit?“ spyrja Einar Hannes og Hörður.
Benda þeir á að um áramótin tekur nýr framkvæmdastjóri við hjá Gildi. Í lok apríl var tilkynnt að Árni Guðmundsson, núverandi framkvæmdastjóri Gildis, myndi láta af störfum í lok árs og Davíð Rúdólfsson myndi taka við stöðu framkvæmdastjóra sjóðsins á þeim tímapunkti. Í tilkynningu á vef Gildi kom fram að Árni hefur starfað hjá sjóðnum í rúmlega 41 ár þegar hann mun láta af störfum. Davíð hefur starfað hjá Gildi síðan árið 2008 og hefur verið staðgengill framkvæmdastjóra frá árinu 2016.
„Fráfarandi framkvæmdastjóri fékk níu mánaða ráðgjafasamning frá sjóðnum okkar í starfslokagjöf. Í heilt ár hefur sá sem á að taka við stöðunni verið í læri hjá núverandi framkvæmdastjóra. Sjóðfélagar munu því þurfa að halda uppi tveimur framkvæmdastjórum – hálaunakörlum – á launum í 21 mánuð þar sem þeir geta ráðlagt hvor öðrum,“ segja Einar Hannes og Hörður.
„Hann er sennilega miklu hærri, kostnaðurinn sem sjóðfélagar þurfa að greiða fyrir að skipta um framkvæmdastjóra lífeyrissjóðsins Gildis, heldur en sú fjárhæð sem hefði þurft að reiða fram til að koma til móts við Grindvíkinga sem flýja hafa þurft heimili sín. Það er ljóst að samtrygging elítunnar hefur sjaldan verið sterkari en núna.“
Einar Hannes og Hörður skora á Árna fráfarandi framkvæmdastjóra Gildis að „afþakka starfslokagjöfina og semja um hefðbundinn þriggja mánaða uppsagnarfrest eins og óbreyttum sjóðfélögum úti í samfélaginu stendur til boða og fólkinu sem hann vinnur fyrir. Svo væri hægt að nota mismuninn til að hjálpa Grindvíkingum í neyð.“
