Í dag var kveðinn upp dómur í Landsrétti. Niðurstaða dómsins er að áfrýjaður dómur Héraðsdóms Reykjavíkur er ómerktur og lagt fyrir héraðsdómara að taka málið til löglegrar meðferðar og dómsálagningar að nýju. Komst Landsréttur að þessari niðurstöðu þar sem meira en fjórar vikur liðu frá munnlegum málflutningi þar til að dómur var kveðinn upp í héraðsdómi og ekki hafði verið bókað að dómari og sakflytjendur teldu ekki þörf á endurflutningi málsins.
Takmarkaðar upplýsingar koma fram í dómnum um hvað málið snýst og málsnúmer í héraðsdómi hefur verið afmáð. Dómur Héraðsdóms Reykjavíkur var kveðinn upp 11. nóvember 2022 en það var Ríkissaksóknari sem áfrýjaði málinu til Landsréttar.
Í dómnum segir að ákæruvaldið hafi krafist þess að ákærði yrði sakfelldur samkvæmt ákærum héraðssaksóknara 7. apríl og 10. maí 2022. Þá hafi ákæruvaldið krafist þess að refsing ákærða yrði þyngd. Loks hefði þess verið krafist að ákvæði héraðsdóms um sviptingu ökuréttar og upptöku yrði staðfest.
Málið virðist því að minnsta kosti hafa varðað umferðarlagabrot.
Í dómnum segir að ákærði hafi krafist sýknu eða vægustu refsingar sem lög leyfa.
Hann virðist einnig hafa verið ákærður fyrir einhvers konar ofbeldisbrot því í dómnum segir að brotaþoli hafi krafist þess að dómur héraðsdóms um greiðslu skaðabóta til hennar yrði staðfestur en ákærði krafðist þess að þeirri kröfu yrði vísað frá eða bæturnar lækkaðar verulega.
Landsréttur kvað hins vegar ekki upp úrskurð um alla þessa þætti. Í niðurstöðukafla dómsins segir að fyrir liggi að málið hafi verið tekið til dóms í Héraðsdómi Reykjavíkur 13. október 2022 en ekki 14. sama mánaðar eins og standi í hinum áfrýjaða dómi. Sá dómur var kveðinn upp 11. nóvember 2022 og segir Landsréttur að því hafi lengri tími en fjórar vikur liðið frá því að málið var dómtekið þar til dómur var kveðinn upp.
Samkvæmt lögum nr. 88/2008 um meðferð sakamála hafi vegna þessa dráttar átt að flytja málið á ný, nema dómari og aðilar málsins teldu það óþarft. Í endurriti vegna þinghalds, í Héraðsdómi Reykjavíkur, komi fram að hvorki sé bókað að málið hafi verið flutt að nýju né að dómari og aðilar málsins teldu það óþarft. Þá sé upplýst að við uppkvaðningu dómsins hafi ekki legið fyrir skrifleg yfirlýsing frá aðilum málsins um að þeir teldu ekki þörf á endurflutningi þess.
Dóminn í heild sinni er hægt að lesa hér:
