Creditinfo hefur sent frá sér fréttatilkynningu vegna frétta og umræðu um breytingar sem fyrirtækið hefur gert við vinnslu lánshæfismats.
Tilkynningin er eftirfarandi:
„Creditinfo vill koma eftirfarandi á framfæri í kjölfar tilkynningar frá Neytendasamtökunum og VR vegna uppfærðs lánshæfismats Creditinfo.
Í nýrri uppfærslu á lánshæfismati Creditinfo hafa verið gerðar breytingar á áhrifaþáttum lánshæfismatsins í samræmi við nýja reglugerð um vinnslu upplýsinga um fjárhagsmálefni og lánstraust nr. 606/2023 sem tók gildi 1. september síðastliðinn.
Lánshæfismat Creditinfo er uppfært reglulega til að tryggja að matið sé eins nákvæmt og áreiðanlegt og mögulegt er hverju sinni sem og ávallt í samræmi við ákvæði persónuverndarlaga. Creditinfo starfar á grundvelli ofangreindrar reglugerðar og hefur ekki með nokkru móti farið á svig við lög, enda er lánshæfismatið uppfært sérstaklega til að taka tillit til nýrrar reglugerðar.
Í tilkynningu Neytendasamtakanna segir:
„Við nýlegar breytingar Creditinfo færðust að sögn 40% þjóðarinnar um lánshæfisflokk. Það eitt og sér gefur tilefni til að ætla að pottur sé brotinn í gerð lánshæfismats hjá Creditinfo.“
Eins og áður segir er Lánshæfismat Creditinfo uppfært reglulega til að tryggja gæði þess og við slíka uppfærslu getur vægi einstakra þátta sem liggja til grundvallar matinu eftir atvikum minnkað eða aukist, nýir þættir teknir til skoðunar eða gamlir felldir út, og lánshæfiseinkunn einstaklinga því breyst.
Við uppfærsluna batnaði lánshæfismat hjá um 25% þjóðarinnar á meðan það versnaði hjá um 15% og stóð í stað hjá 60%. Flestar breytingar voru þó litlar, hnikun um einn til tvo flokka (t.d. frá A3 upp í A1). Hin aukna notkun á vanskilasögu varð til þess að innan við 1% þjóðarinnar fór úr flokkum A eða B, niður í C1 eða neðar.
Við viljum benda á að einstaklingum er boðið upp á það að heimila notkun aukaupplýsinga við gerð lánshæfismats á Mitt Creditinfo og ef þær upplýsingar sýna að engin fjárhagsleg vandræði hafi komið upp nýlega þá minnka áhrif fyrri vanskil verulega. Þá eru ítarlegar fræðsluupplýsingar fyrir hinn skráða aðgengileg öllum í gegnum Mitt Creditinfo.
Í tilkynningunni eru einstaklingar hvattir til að senda tölvupóst á Creditinfo til að óska eftir upplýsingum um áhrifaþætti lánshæfismats þeirra. Allar upplýsingar um áhrifaþætti lánshæfismats einstaklinga eru aðgengilegar á Mitt Creditinfo. Til að tryggja örugg samskipti og persónuvernd viljum við beina öllum fyrirspurnum um uppfært lánshæfismat í gegnum Mitt Creditinfo.“
Undir tilkynninguna ritar Hrefna Sigfinnsdóttir forstjóri Creditinfo.
