Rússar hertu í gær árásir sínar á úkraínska bæinn Avdiivka sem er í austurhluta Úkraínu. Þeir hafa sótt að bænum síðustu vikur og reyna nú hvað þeir geta til að ná honum á sitt vald fyrir áramót. Þeir hafa orðið fyrir gífurlegu mannfalli í orustunni um bæinn og er óhætt að segja að Pútín sendi hermenn sína út í opinn dauðann á þessum slóðum.

Breska varnarmálaráðuneytið segir að mannfall Rússa við bæinn sé líklega það mesta í nokkurri orustu í stríðinu til þessa.

Rússar hafa nánast umkringt bæinn og lætur stórskotalið þeirra skotum rigna yfir bæinn. Óstaðfestar fregnir herma að á móti hverjum einum úkraínskum hermanni sem falli við bæinn þá falli tuttugu rússneskir. Talsmaður Volodymyr Zelenskyy, Úkraínuforseta, sagði nýlega að Rússar hafi ótakmarkaðan fjölda af hermönnum sem þeir noti miskunnarlaust til að senda mannlegar árásarbylgjur fram á vígvellinum.

Rússar gangsettu í síðasta mánuði nýja tilraun til að ná bænum úr höndum úkraínskra hersveita. Þeir hafa náð að sækja aðeins fram en tap þeirra er gríðarlegt, bæði mælt í mannslífum og búnaði.