Auglýsing Árna, sem birtist í hópnum Vinna með litlum fyrirvara, var svona:
„Auglýsi eftir húsmæðraskólagenginni dömu frá Húsmæðraskóla Íslands (skilyrði) sem er 100% íslenskumælandi og gæti tekið að sér að sinna glæsilegu heimili á 250 fermetrum hvar búa 5 hundar, 5 kettir þrír arar, auk mín, sem fer mjög lítið fyrir. Ágæt laun í boði fyrir vandvirka, agaða og rétt menntaða dömu.“
Fjölmargir skrifuðu athugasemdir við færsluna en fæstir virtust þó áhugasamir um að taka að sér starfið sem Árni auglýsti.
„Af hverju sinnir þú ekki bara heimilisstörfunum sjálfur,“ spurði ein kona og svaraði önnur þá að bragði að hann hefði sennilega ekki rétta menntun. Árni svaraði sjálfur með þessum orðum: „Af því ég er getulaus….altso á því sviði.“
Önnur kona spurði hvers vegna konan þarf að vera húsmæðraskólagengin. „Ertu að segja að kona sem er ekki með þá menntun hafi þá ekki þekkingu til að sinna 250 fm heimili?“
Þessu svaraði Árni Stefán svona:
„Hún þarf að vera Húsmæðraskólagengin af því ég vil hafa það þannig. Ég hef ekki nokkra hugmynd um hvaða þekkingu kona sem er óskólagengin hefur til að bera, barasta ekki nokkra.“
Það voru samt þó nokkrir sem komu Árna til varnar og sáu ekkert athugavert við auglýsinguna. Í þeim hópi var útvarpsmaðurinn Heiðar Austmann og uppskar athugasemd hans rúmlega 70 læk.
„Ég elska siðgæðisverðina hérna sem telja sig knúna til að skjóta á mann eða koma með athugasemdir yfir því að hann tilgreinir manneskju sem HANN vill og HANN ætlar að borga laun fyrir. Hann óskar eftir manneskju með ákveðinn bakgrunn sem hann treystir í þetta verkefni. Hann er í 100% rétti að óska eftir manneskju með ákveðna eiginleika og menntun og það er ekki ykkar að skjóta það niður. Voðalega eru margar smásálir hérna inni.“
