Yfir tugur einstaklinga situr uppi með sárt ennið eftir viðskipti sín við svikaparið Sigurvin Frey Hermannsson og Katrínu Maríu Karlsdóttur og ætla má að þau hafi haft yfir 130 milljónir króna af grunlausum viðskiptavinum sínum. Þetta segir veitingamaðurinn Árni Björn Björnsson frá Sauðárkróki sem er einn þeirra sem keypti forsmíðað timburhús af parinu og greiddi 2/3 hluta af kaupverðinu, alls 16 milljónir króna, í tveimur millifærslum inn á fyrirtæki parsins en húsið, sem átti að vera smíðað í Lettlandi, kom aldrei til landsins.
Árni Björn lýsti svikamylllunni í samtali við DV í sumar en sú saga er áþekk þeirri sem var úrskurðað um í Héraðsdómi Reykjavíkur í liðinni viku. Þar vann annar kaupandi, Sigurður Vignir Óðinsson, sigur í einkamáli gegn Sigurvini Frey, Katrínu Maríu og fyrirtæki þeirra þar sem úrskurðað var um að þeim bæri að endurgreiða honum tæpar 10,5 milljónir króna auk vaxta fyrir að hafa svikið hann um forsmíðað hús sem hann hafði greitt 2/3 hluta kaupaverðsins fyrir.
Að sögn Árna Björns eru þessi tvö mál hins vegar aðeins toppurinn á ísjakanum. „Þeir sem að hafa verið sviknir af þeim hafa haldið hópinn og af þeim málum sem ég þekki þá eru þetta um 130 milljónir króna sem að þau hafa haft af fólki. Það kæmi mér þó ekki á óvart ef upphæðin væri nærri 200 milljónum króna. Það eru eflaust ekki allir sem hafa stigið fram og haft samband, það fylgir því mikil skömm að hafa lent í svona svikamyllu,“ segir Árni Björn.
Í nýföllnum dómi Héraðsdóms Reykjavíkur kemur fram að mál Sigurðar Vignis sé á borði héraðssaksóknara en þangað kærð Árni Björn einnig sitt mál. „Ég kærði þau fyrir fjársvik og það mál er í rannsókn. Ég vona að því ljúki með fangelsisdómi. Það þarf að tryggja að þetta fólk fái ekki að koma að fyrirtækjarekstri í náinni framtíð,“ segir Árni Björn.
Parið hélt úti neti fyrirtækja sem öll auglýstu forsmíðuð timburhús frá Lettlandi eða Úkraínu, til að mynda Smart Timber Solution, Smart modular Ísland, Timbursalan, Sigurþing Solution og SF Capital ehf. svo nokkur séu nefnd.
