Maður sem setið hefur i gæsluvarðhaldi síðan 4. september, grunaður um að hafa misþyrmt fyrrverandi unnustu sinni í skóglendi á höfuðborgarsvæðinu, hefur verið ákærður. Þetta staðfestir Kolbrún Benediktsdóttir, varahéraðssaksóknari, við Mbl.is í gær. DV óskaði eftir afriti af ákærunni í dag en ekki var hægt að fá það afhent þar sem ákæran hefur ekki verið birt sakborningi.
Upplýsingar um árásina er að finna í gæsluvarðhaldsúrskurði yfir manninum sem staðfestur var af Landsrétti þann 30. október. Sjá hér.
Um árásina segir meðal annars í gæsluvarðhaldsúrskurðinum:
„Fimmtudaginn 24. ágúst síðastliðinn barst lögreglu tilkynning um aðila sem hefði orðið fyrir árás og væri með skurð á höfði. Brotaþoli var staðsett við […]við […]í […]. Er lögregla kom á vettvang kom brotaþoli gangandi á móti þeim úr skóglendinu ásamt aðila sem hafði orðið vitni að árásinni. Brotaþoli var öll útötuð í blóði og lak blóð úr höfði hennar. Hún var einnig rennblaut, ísköld, skalf öll og í var miklu uppnámi. Aðspurð kvaðst brotaþoli hafa verið með varnaraðila. Hann hefði ráðist á hana, lamið og sparkað í höfuð hennar,tekið hana hálstaki og hent henni út í læk. Sagði hún að varnaraðili hefði síðan hlaupið á brott.
Var brotaþoli flutt á slysadeild. Á slysadeild var tekin skýrsla af brotaþola. Kvaðst hún hafa verið með varnaraðila við […]í […]. Varnaraðili væri fyrrverandi kærasti hennar en samband þeirra hefði verið ofbeldisfullt. Þau hafi rifist og hann hefði slegið hana ítrekað í andlitið. Þá hefði hann sparkað ítrekað í höfuð hennar. Svo hefði hann dregið hana að læknum og kyrkt hana ofan í læknum undir vatni. Þá hefði vitni komið á vettvang sem hefði öskrað til þeirra hvort allt væri ekki í góðu og þá hefði kærði farið á brott.“
Eftir þetta lýsti lögregla eftir manninum og hann var síðan handtekinn 2. september. Reyndi hann að flýja undan lögreglu. Var hann yfirheyrður 3. september en neitaði sök. Eins og sést í tilvitnuðum texta úr úrskurðinum hér að ofan var vitni að árásinni. Matsgerð frá réttarlækni lýsir miklum áverkum á konunni, m.a. brot í augntóft og nefi. Áverkarnir benda til ofbeldis, m.a. að sparkað hafi verið í höfuð konunnar.
Búast má við að réttað verði í málinu á fyrri hluta næsta árs.
