Í dag stendur yfir svokallaður Svartur föstudagur (e. black friday) í mörgum verslunum. Á þessum degi bjóða verslanirnar upp á ýmiss konar afslætti og tilboð. Margir neytendur eru án efa spenntir fyrir því að geta gert góð kaup. Starfsfólk Góða hirðisins, nytjaverslunar Sorpu, er hins vegar ekki eins spennt fyrir þessum degi. Í myndbandi á Facebook-síðu verslunarinnar er Svartur föstudagur sagður myrkur dagur fyrir umhverfið og fullyrt að megnið af vörum sem keyptar eru á þessum degi endi innan ekki svo langs tíma í ruslinu. Eru áhorfendur hvattir til að kaupa frekar notaðar vörur umhverfisins vegna en Góði hirðirinn selur notaðar vörur.

Í myndbandinu talar starfsmaður verslunarinnar sem ekki er nefndur á nafn. Hann segir að ákveðið hafi verið að hafa verslunina myrkvaða á þessum degi. Hann fer einnig yfir ýmsar tölur um nýtingu á vörum sem keyptar eru á Svörtum föstudegi. Það kemur hins vegar ekki fram í myndbandinu hvaðan þessar tölur eru fengnar. Þær eru eftirfarandi:

„80 prósent af vörum sem keyptar eru á svörtum föstudegi enda í ruslinu eftir litla sem enga notkun.“

„70 prósent af þeim raftækjum sem eru keypt á Svörtum föstudegi er ekki hægt að endurnýta.“

„60 prósent af fatnaði keyptum á Svörtum föstudegi endar í urðun.“

„Yfir 70 prósent af plasti utan af því sem keypt er á Svörtum föstudegi endar ekki í endurvinnslu.“

Myndbandið má sjá hér fyrir neðan: